OweChiefs uphawula ngokudlala kwiHome of Legends Cup

• Intatheli yeLISENETHINI

Njengoba iBetway Premiership isekhefini lewindi lemidlalo yamazwe ngamazwe eligunyazwe yiFifa, iKaizer Chiefs izobajabulisa abalandeli bayo ngalesi sikhathi. 

Leli qembu laseNaturena, eSoweto, selivume ukudlala emqhudelwaneni obizw angeHome of Legends Cup.

Lo mqhudelwano uzoba ngoMgqibelo eNelson Mandela Bay Stadium eGqeberha kanti uzodlalwa amaqembu amane.  

Uzoba yingxenye yomcimbi wosuku olulodwa ohlelwe yiMandela Bay Development Agency.

IChiefs iyingxenye yamaqembu amanje okuyiMamelodi Sundowns, iGolden Arrows, neChippa United engosokhaya.  

UJessica Motaung, ongumqondisi ophikweni lwezokumaketha kwiChiefs, ujabule ngalo mqhudelwano oyithuba lokuhlangana kweqembu nabalandeli balo base-Eastern Cape.

“Sijabule kakhulu ngokujoyina lolu hlelo,” usho kanje. “I-Home of Legends Cup ikhombisa uthando lwethu lwebhola nobumbano lweNingizimu Afrika.”  

Umqeqeshi uNasreddine Nabi uzobe engenabo abadlali ababili. URushin Dortley noFiacre Ntwari abasemaqenjini esizwe.

UNtwari ukwiRwanda kanti uDortley ukwiBafana Bafana ezibhekana ne-Uganda neSouth Sudan ngalesi sikhathi sewindi leFifa.

UJessica Motaung ukhuthaza abalandeli ukuthi bawuhambele lo mqhudelwano. 

“Abalandeli bethu bayamangalisa kule sizini. Umdlandla wabo yiwo onika iqembu amandla,” uqhube kanje.  

Lo mqhudelwano ungaphezu kokuncintisana kwamaqembu enkundleni – uwumbukiso wokuthi ibhola libahlanganisa abantu. 

• OLUNYE UDABA: Kuvuke umunyu kunozinti eqokwa kwiBafana

Amathikithi alo mqhudelwani atholakala eWeb Tickets nasezitolo zakwaPick n Pay ezweni lonke.