OweChiefs noweDowns ‘kwabayizipele’ kwiBafana Bafana
Umqeqeshi weBafana Bafana uHugo Broos ugade ngabadlali abathathu ukuthi uma kuba khona ongaphumeleli kwabaqokele esikwatini e-Afcon kungene bona.
Lo mqeqeshi odabuka eBelgium umemezele iqembu lakhe labadlali abangu-25 azoya nabo eMorocco la eyodlala khona kulo mqhudelwano.
IBafana Bafana ingelinye lamaqembu esizwe abhekwe ngabomvu futhi ayizintandokazi ekutheni engadla isicoco se-Afcon.
Lokhu kungenxa yokuthi yasebenza kahle emqhudelwaneni odlule, futhi yaphinde yakhombisa ukunyuka kwezinga emidlalweni yokuhlunga.
Izoqala umkhankaso wayo ngoDisemba 22 laizobhekana khona ne-Angola eMarrakesh , bese ilandela ne-Egypt ngoDisemba 26
Iyobe seyivala imidlalo yesigaba samaqoqo ngokubhekana neZimbabwe ngoDisemba 29 – yonke le midlalo kulindeleke ishube.
Ngesikhathi ememezela iqembu lakhe ngoMsombuluko emini, uBroos uvume ukuthi bekungelula njengoba bekumele ashiye ngaphandle abadlali abangu-30.
Ngokwemithetho yeCaf elawula lo mqhudelwano, iqembu ngalinye livumeleke ukubhalisa abadlali abangu-23 kodwa lingafina nabangu-27.
Izindleko zalaba abanye abangaphezulu zikhokhelwa yinhlangano eyengamele ibhola kulelo lizwe, kuleli okuyiSafa.
Nokho ngaphezu kwalaba abangu-25, uBroos ube esecuphisa ngabanye abathathu abazogada ukuthi uma kuba khona oliimalayo kulaba abangu-25, bese engena ezovala isikhala.
Kulaba badlali abathathu kukhona uMduduzi Shabalala weKaizer Chiefs, u-Iqraam Rayners weMamelodi Sundowns noThabo Moloisane weStellenbosch FC.
IBafana Bafana izoqala ikhempu yayo yokulungiselela lo mqhudelwano ngoMsombuluko ozayo ngemuva kokusongwa kwemidlalo yePSL kulo nyaka.
ISundowns – enabadlali abahlanu kwiBafana – izodlala umdlalo weBetway Premiership neSiwelele FC – enoyedwa – ngoLwesithathu ebusuku.
I-Orlando Pirates, okuyiyo enabadlali abaningi njengoba inabayisishiyagalolunye, izodlala umdlalo wamanqamu weCarling Knockout Cup neMarumo Gallants ngoMgqibelo.
FUNDA NALA / UBroos uvume ukusinda eqoka eleBafana
UBroos uzobe emincele ukuthi kubadlali abaqokile kulamaqembu abekho abazolimala kulo mdlalo.
ZITHOLE ZISHISA: Cofa lapha usithole kwiWhatsApp Channel yethu
