IChiefs ezingxoxweni neSuperSport ngowaduma kwiPirates

IKaizer Chiefs ivule ngokusemthethweni izingxoxo neSuperSport United ukuze idayiselwe umdlali wasesiswini uSiphesihle “uBafo” Ndlovu.

Njengoba isizini ka-2025/26 isondela ngokushesha, amakhosi asebenza ngokushesha ukuze aqinise isikwati sawo. 

Sezikhona izivumelwano asezivele zenziwe, kodwa azikho izimemezelo ezisemthethweni ezisenziwe okwamanje.

IKaizer Chiefs inethemba lokuphothula ukusayinwa kukaNdlovu kusenesikhathi ukuze ihambe naye uma seyiya ekhempini yokulungiselela isizini eNetherlands.

UNdlovu ujoyine iSuperSport United esuka kwi-Orlando Pirates eminyakeni emithathu edlule. 

Waqale wafika kuyo ebolekisiwe. Kodwa wenza okwanele ukuze athole inkontileka egcwele kuleli qembu.

ISuperSport isanda kusebenzisa umbandela wokwelula inkontileka yakhe ngomunye unyaka. 

Lokho kusho ukuthi iKaizer Chiefs kumele ixoxisane ngemali ezoyikhokha uma imfuna manje – noma ilinde unyaka ozayo.

Nokho iSABC Sport ibika ukuthi izingxoxo phakathi kwala makilabhu zisezingeni eliphezulu impela futhi zongase zithophulwe maduze. 

Uma konke kuhambe kahle, uNdlovu angase abuyele eSoweto – kodwa kulokhu ngakolunye uhlangothi.

Lo mdlali oneminyaka engu-28 ubudala ube nomkhankaso oncomekayo ka-2024/25. 

Uphuthelwe yimidlalo emithathu kuphela yeligi, washaya amagoli amabili, wakhela ozakwabo ababili.

Naphezu kwesizini ebingeyinhle yeSuperSport, uNdlovu ube ngomunye wabadlali abenze kahle futhi abebenomgqigqo omuhle. 

• FUNDA NALA | IStellies iklolodele iCape Town City idliwa yizembe

Manje, njengoba kunamahlebezi okuthi iSuperSport ingase ithengise isitifiketi sayo seBetway Premiership, kubikwa ukuthi ivulelekile ukudayisa lo mdlali wasesiswini. 

Naye uNdlovu kuthiwa uyalifisa ithuba lesiqalo esisha kwazise ikusasa alicaci kahle kwiSuperSport ngenxa yalamahlebezi akhona.

• SIJOYINE KU-FACEBOOK | Lisenethini.co.za  

Abalandeli beKaizer Chiefs bangalindela izimemezelo ezinkulu maduze nje – kanti uNdlovu angase abe ngomunye wabadlali abasha abazothulwa eNaturena!