OwaseNigeria obejima nePirates usekhonjwa kwelaseKZN
Umdlali wasemuva waseNigeria uChimzulam Collins Nwoburuoke kulindeleke ukuthi aqedele ukuya eqenjini laKwaZulu-Natal ngemuva kokuchitha izinsuku ezimbalwa ezilolonga ne-Orlando Pirates.
UNwoduruoke kuthiwa ubehlolwa kwiPirates kodwa manje kubukeka sengathi usezojoyina iqembu elisanda kukhushulelwa kwiBetway Premiership iDurban City.
Leli qembu elizinze KwaZulu-Natal lisaqinisa isikwati salo njengoba lilungiselela umkhankaso walo wokuqala kwiligi enkulu kulandela ukunyuselwa kuyo lisuka kwiMotsepe Foundation Championship.
Ngemuva kokukhushulelwa kule ligi ephezulu, iDurban City yenze izinguquko ezinqala ethimbeni layo layo lezobuchwepheshe.
- UGavin Hunt uqokwe njengomqeqeshi oyinhloko, engena esikhundleni sikaSimo Dladla.
- Umakadebona womqeqeshi u-Ernst Middendorp yena ungene esikhundleni sokuba ngumqondisi wezokuqeqesha wekilabhu.
UHunt usevele ulande abadlali abaningi abanamava okubalwa kubo uDarren Keet, uThabo Nodada, uHaashim Domingo, uPatrick Autata, uBrooklyn Poggenpoel, uTrevor Mokwena, uKyle Jurgen noLiam De Kock.
UNwoburuoke, ongumdlali wasemuva osezingeni eliphezulu, ubezilolonga ne-Orlando Pirates ngenhloso yokuthola inkontileka emasontweni ambalwa edlule.
Kodwa ngokubika kweFARPost, useyekile ukuzilolonga balezi ziqhwaga zaseSoweto. Manje useseThekwini la kubhekwe aqedele khona ukusayina kwiDurban City.
“UChimzulam Collins Nwoburuoke useyekile ukuzilolonga ne-Orlando Pirates. Usendleleni ebheke kwiDurban City.
“Okwamanje, sekusele imininingwane emincane nje edinga ukulungiswa, futhi isivumelwano sizokwenzeka maduze.
“Ungumdlali osezingeni elihle ozokwengeza ikhwalithi kwiDurban City,” kucashunwe umthombo usho kanje.
FUNDA NALA | UNtwari uveza okumkhuthazayo yize eqiwa yijezi kwiChiefs
Okuthatha amehlo wukuthi iDurban City ike yamhlola uNwoburuoke ngesikhathi ilungiselela isizini kodwa yakhetha ukungamsayini.
Kodwa manje manje sekuyamangaza ukuthi sebebuyele kuye. Mhlawume kungenxa yokuthi abamtholanga uThulani Hlatshwayo abebebheke ukumsayina.
