Lithatha elinye igxathu elikaNurkovic neRoyal AM
- Intatheli yeLISENETHINI
Ummeli omele umgadli uSamir Nurkovic odabeni usecele iPremier Soccer League (PSL) ukuthi ingenelele ekukhokhelweni kwakhe yiRoyal AM u-R25 million emkweleta wona.
Ifuna ukuthi iPSL icembule kulo R2 millions wesibonelelo esinikeza amakilabhu inyanga nenyanga ukuvala lesi sisele seRoyal AM.
Ekhuluma ngokukhethekile neSABC Sport kulandela isinqumo sakamuva seCourt of Arbitration for Sport (Cas).
ICas yakhipha isinqumo esichitha isicelo seRoyal AM sokuthi kuqedwe isigwebo sayo eyasinikwa yiFifa sokuvinjelwa ukusayina abadlali.
Lezi zindaba ziqinisekiswe ummeli kaNurkovic, uDavor Lazic ngoLwesibili.
“Bona (i-Royal AM) badinga ukukhokhela izindleko zomthetho nezokulamula kwe-CAS.
“Kumele futhi bakhokhe le mali ekweletwayo isihlangene nenzalo, engamaphesenti amahlanu,” kuchaza ummeli.
Ngokombhalo onesinqumo senkantolo, isamba iRoyal AM esikweleta uNurkovic singu-R15 million.
ULazic ukuqinisekisile ukuthi sebelubeke ezithebeni zePSL neSAFA udaba lwabo ukuze bangenelele ngokucembula le mali kwiRoyal AM.
“Esikubuzile, futhi lokhu kungokwemithetho yabo, ukudonsa emalini ekhokhwa eqenjini.
“Njengoba nazi, ngenxa yokuvuma ukuba yilungu lePSL, kusho ukuthi ikilabhu igunyaze iligi ukuthi idonse le mali.
“Esikucelayo wukuthi iligi ilandele eyayo imithetho inikeze lo mdlali le mali.”
Uma iPSL ingaqhubeka nalokhu kusukela manje kuze kuphele isizini ngoJuni, imali engabe seyikhokhelwe uNurkovic izoba ngu-R14 million.
Ngaphezu kokuphoqa ukukhokhelwa imali abayikweletwayo, uLazic uthe basangaqhubeka nokucela iFifa ukuthi iyishaye ngesinye isigwebo iRoyal AM.
“Sicela esinye isigwebo esengeziwe, okungaba ukudonswa kwamaphuzu nokwehliselwa esigabeni esiphansi.
“Kungaba kuhle ukuthi iligi neqembu bangavumi sihambe ngale ndlela ngoba kuzophazamisa ukuma kweligi neminye imidlalo eminingi esivele idlaliwe. Kungcono ukukhokhela umdlali,” kwengeza uLazic.
I-Royal AM ayikasho lutho esidlangalaleni selokhu kwaphuma isinqumo sakamuva seCas, kanti iPSL imise iqembu leDStv Diski Challenge lale kilabhu.
Lokhu kudalwe wukushoda kwabadlali ngenxa yokuvinjelwa kwayo yiFifa ukuthi isayine abadlali.
