Lisina limjeqeza izembe uDladla kwi-Arrows, kuvela ongase ‘amketule’

Ikusasa lika-Pitso Dladla kwi-Golden Arrows seliyangabazeka njengoba kubikwa ukuthi abaphathi abaneme ngomsebenzi wakhe.

Ngokubika kweSoccerBeat, i-Arrows isiqalile ukucubungula kabanzi ukuthi kungabe kufanele yini ayekwe aqhubeke nomsebenzi, noma kumele adedelwe. 

Leli qembu laseThekwini lisanqobe umdlalo owodwa kuphela kweyisishiyagalombili yeligi kule sizini. 

Lesi yisimo esingesihle kuleli qembu njengoba linezifiso zokwenza kahle kwiBetway Premiership.

Kubikwa ukuthi uMandla Ncikazi, oyiphini lomqeqeshi kwi-Orlando Pirates, nguyena ohamba phambili kokubhekwe ukuba banikwe lo msebenzi uma uDladla ehluleka.

UNcikazi ulazi kahle leli qembu laseThekwini njengoba ake wasebenza kwi-Arrows ngaphambi kokujoyina iPirates eminyakeni engaphezu kwemihlanu edlule.

Isikhathi asichithe eSoweto sesimnikeze ulwazi namava engeziwe, njengoba ebesebenza nabaqeqeshi abahlukene.

Nokho, asikho isiqinisekiso sokuthi i-Golden Arrows izothatha siphi isinqumo ngo-Pitso Dladla kodwa kubukeka isimo simshubele. 

• FUNDA NALA | Kuvela okwenze uKomphela aqunsule owase-Angola

Imiphumela yemidlalo ezayo ingaba nomthelela omkhulu ekutheni ikusasa lakhe libukeka kanjani.

Uma engakwazi ukuguqula izinto ngokushesha, ingcindezi ingase iqhubeke nokwanda.

• EZISHISAYO!| Cofa lapha usithole kuWhatsApp