IPirates ithuswe yiWaves, yadlulela phambili kwiChamps League

I-Orlando Pirates isiqhubekele esigabeni sesibili sokuhlunga kwiCAF Champions League ngemuva kokunqoba iLa Cure Waves ngo-3-1 ngoMgqibelo.

U-Abdeslam Ouaddou ubephoqeleke ukwenza izinguquko eziningana, njengoba uGampani Lungu noTshepang Moremi bebengekho ngenxa yokulimala nokumiswa.

UKabelo Kgositsile, uNeo Rapoo, noSimphiwe Masilela bangene eqenjini eliqale umdlalo.

Izivakashi zishukumise i-Orlando Amstel Arena zilishaya kuqala igoli kulo mdlalo, kwangathi zizoyiqansisela iPirates.

UJean Ami usebenzise iphutha likanozinti uSipho Chaine, oshwebe ibhola qede wazitholela uqekelele.

I-Orlando Pirates nokho isheshe yabuyela emdlalweni njengoba uKgositsile eshaye elokulinganisa emizuzwimni emibili ukusuka kulesi sigameko.

Iqembu laseSoweto liqhubekile nokucindezela, lazi kahle ukuthi ukudlala ngokulingana ngeke kwanele.

Ngomzuzu ka-25, uKamogelo Sebelebele ube eseshaya elesibili, kanti uYanela Mbuthuma ushaye elesithathu ngaphambi kokuthi kuyiwe ekhefini.

I-Orlando Pirates iqhubekile nokulaqula umdlalo nasesiwombeni sesibili, kodwa yehluleka ukwengeza amagoli yize iwatholile amathuba amahle.