Kuvela okudumaze uSiyabonga Ngezana ngeleBafana
USiyabonga Ngezana kubikwa ukuthi ukhala uyazithulisa ngemuva kokungaqokwa eqenjini likaBafana Bafana elizodlala kwiNdebe yoMhlaba.
Lokhu kudalulwe ngumqeqeshi wesikhashana weFCSB uLucian Filip.
Kuthiwa ukuqinisekisile ukuthi lo mdlali wasemuva akayitholanga incwadi emubizela eqenjini lesizwe.
“Lutho. USiyabonga Ngezana akabizelwanga eqenjinie leNdebe yoMhlaba,” kusho uFilip kwi-Antena AS.
“Uphoxekile, kodwa leyo yimpilo, umsebenzi wakhe alupheli ngalokho.”
UFilip uphinde wagqamisa indima ebalulekile eyadlalwa yiFCSB ekusizeni uSiyabonga Ngezana ukuthi ahlonishwe ezingeni lomhlaba.
Lo mdlali wasemuva wajoyina leli qembu laseRomania kungazelele muntu eminyakeni emithathu edlule esuka kwiKaizer Chiefs.
“Kufanele ahloniphe ikilabhu yakhe, ngenxa yayo, ukwazile ukungena eqenjini lesizwe,” kwengeza uFilip.
USiyabonga Ngezana ube nenqubekela phambili ebonakalayo eRomania kusukela eshiye iChiefs.
Waqoka waba yisitobha esivelele ngesizini yakhe yokuqala eRomania.
Ubesengomunye wezethenjwa zikaHugo Broos ngaphambi kokuthi alimale ngasekuqaleni kwalo nyaka.
Ubekhona kwi-Afcon ebiseMorocco ngoDisemba futhi wadlala yonke imidlalo yeBafana.
UBroos akakasimemezeli isikwati sakhe sokugcina – futhi kulindeleke ukuthi aqoke iqembu lakhe azoya nalo eMexico ngoMeyi 27 ePitoli.
