Ingabe iyiqiniso eyase-US? UMbekezeli Mbokazi uyaziphendulela
Ngu-Alfred NGUBANE
UMbekezeli Mbokazi usebhoboke okokuqala ngesinyathelo esilandelayo empilweni yakhe njengoba kubhekwe ayoqala impilo kwi-US Major League ngonyaka ozayo.
Kusukela kwavela izindaba zokuthi lo mdlali we-Orlando Pirates uya phesheya, ubengakaze akhulume ngalokhu, futhi nalo iqembu alikaze lisho lutho.
Kodwa ke, engxoxweni ekhethekile neLisenethini eMoses Mabhida Stadium ngemuva komdlalo wabo neDurban City, uvuleleke ngoshintsho empilweni yakhe njengoba esesayine kwiChicago Fire.
“Ngaqala ngatshelwa ngumphathi wami uBasia Michaels ukuthi usengitholele umsebenzi omusha engizoqala kuwona ngoJanuwari,” kusho uMbekezeli Mbokazi.
“Wathi ngizoyishiya i-Orlando Pirates ngijoyine iChicago Fire yase-USA ngoJanuwari kodwa sizoqale sihambe siyosayina ngoba u-Irvin Khoza usevumile ukuthi ngijoyine iChicago Fire.
“Ngaqale ngathuka ngibona ukuthi ngiyashiya ngempela kwi-Orlando Pirates njengoba kuyikhaya lami lesibili nje.”
UMbekezeli Mbokazi uthi yize ebesathanda ukuba kwi-Orlando Pirates, kodwa wabona ukuthi leli yithuba eliyivela kancane futhi elizomkhulisa.
“Ngagcina sengiqonda ukuthi kumele ngilithathe leli thuba nami ngiyozikhulisa njengomdlali webhola,” kuqhuba uMbokazi.
“Ngibonga uMdali nabaphansi bakomalume kwaMhlongo nabakithi kwaMbokazi ngokungihlenga njalo nokuvula lamathuba.”
Ube eseveza nokumhluphayo enliziyweni yakhe – ukuthi yize ephumelela kanje, ufisa ngabe abazali bakhe bakhona ukuze abajabulise.
“Khona kunzima ukuthi abazali bami angihlalanga nabo isikhathi esanele emhlabeni,” kusho yena ezwakala ukuthi imphatha kabi le ndaba. “Ngeshwa ke basheshe badlula emhlabeni bobabili.”
FUNDA NALA | UHunt usole uMbokazi ngobudedengu kumilama oweCity
UMbokazi, oume ngelikaTLB ebholeni, kulindeleke ukuthi ayoqala impilo entsha e-US ngemuva kweCaf Africa Cup of Nations (Afcon).
ZITHOLE ZISHISA: Cofa lapha usithole kwiWhatsApp Channel yethu
