Ingabe akhona ngampela afuna uMbokazi? Imenenja iyaphendula
Imenenja yomdlali wasemuva weChicago Fire neBafana Bafana, u-Mbekezeli Mbokazi, uBasia Michaels, isiphawule ngokufunkwa kwalo mdlali.
Ithi ifoni yayo ayisathuli kulandela indlela lo mdlali adlale kahle ngayo kwiNdebe yoMhlaba muva nje.
UMbokazi oneminyaka engu-20 ubudala uqale ukuvelela ngesikhathi enyuselwa eqenjini elikhulu kwi-Orlando Pirates ngo-2025.
Ube esedayiselwa iChicago Fire edlala kwi-US Major League Soccer ngoJanuwari, nakuyo wafike waqhubeka nokuvelela.
Uphinde wadlala indima enkulu ngesikhathi iBafana ifinyelela esigabeni somkhumulajezi kwiNdebe yoMhlaba.
Ekhuluma ne-iDiski Times, uMichaels uthe sekunamaqembu amaningi akhombisa intshisekelo ngoMbokazi.
“Ifoni yami imatasa kakhulu, kodwa lokho kuyinto enhle,” kuchaza le ntokazi.
“Kusasekuseni ukusho ukuthi yiziphi izingxoxo ezizogcina ziphumelele, kodwa baningi abamele amaqembu asebeqalile ukwenza uphenyo ngaye.”
Uthe uzokwazi ukuthi sekubucayi uma sekuqala ukushaya izikhulu zamaqembu zibuka ngo-Mbekezeli Mbokazi.
“Uma sekuqale amaSporting Director ukufona, ngizobe sengazi ukuthi sekuwudaba olubucayi.”
UMichaels uthe akangabazi ukuthi uMbokazi unalo lonke ikhono lokudlala kwelinye lamaqembu amakhulu ase-Europe.
Kodwa wagcizelela ukuthi amaqembu afuna abadlali base-Afrika kufanele akhokhe imali efanele.
“Ithalente likaMbeke alinakuphikiswa. Ufanele ukudlala kulawo maligi,” kuchaza uMichaels.
“Kodwa amaqembu afana ne-Orlando Pirates neChicago Fire atshale imali enkulu kuye, ngakho kufanele athole inzuzo efanele uma emthengisa.”
Uqhube wathi abadlali base-Afrika akufanele babukelwe phansi ngoba bengakaze badlale e-Europe.
“Abantu bayalibona ikhono lakhe, kodwa kufanele balikhokhele,” kuqhuba yena.
“Ukungabi nawo amava ase-Europe akusho ukuthi umdlali kufanele adayiswe ngemali encane.”
UMichaels uphinde wancoma amazwi kaRelebohile Mofokeng, owake wavikela izinga leBetway Premiership.
“Ngiyavumelana noRele. IBetway Premiership ingenye yamaligi aqinile, futhi kufanele lihlonishwe emhlabeni wonke.
“Abadlali bethu banekhono futhi bafanele ukukhokhelwa inani labo langempela.”
- FUNDA NALA | U-Ouaddou nethemba ngentsha kwiPirates
Njengoba iqhubeka intshisekelo ngo-Mbekezeli Mbokazi, sekubhekwe ngabomvu ukuthi yiliphi iqembu elizogcina limsayinile.
- EZISHISAYO| Cofa lapha usithole kuWhatsApp
