IPirates igabhe iChicago Fire qede yakhalela koweGalaxy
Sekuvele ukuthi iChicago Fire iqale kwi-Orlando Pirates ifuna ukudayiselwa omunye wabadlali bayo ngaphambi kokudlulela kwiTS Galaxy.
Leli qembu le-US Major League Soccer selinabadlali ababili bakuleli okungoMbekezeli Mbokazi noPuso Dithejane.
UMbokazi imsayine kwiPirates ngasekupheleni konyaka odlule, kanti uDithejane imthole kwiTS Galaxy kuleli sonto.
Nokho sekuvele ukuthi ngaphambi kokudlulela kwiGalaxy iyofuna uDithejane, iqale kwiPirates ifuna u-Oswin Appollis.
Lokhu kuvezwe yiSoccer Beat embikweni wayo kuleli sonto, la iqinisekise ukuthi leli qembu belisha amashushu ngo-Appollis kodwa lagajwa.
“IChicago Fire beyizimisele ngo-Oswin Appollis, kodwa i-Orlando Pirates beyingazimisele ukumdedela okwamanje.
“Leli qembu leMLS libe selijikela kuPuso Dithejane,” kusho lo mbiko. UDithejane usayine iminyaka emine kuleli qembu.
Ezethula kubalandeli balo, lo mdlali oneminyaka engu-21 ubudala uthe usekubheke ngabomvu ukusebenzela ngokuzinikela leli qembu.
“Ngijabule kakhulu ukujoyina le kilabhu enhle kangaka nokuba yingxenye yento ekhethekile,” kusho uDithejane.
“Sengijahe ukungena enkundleni ngikhiphe wonke amangwevu ami phambi kwenu. Ngizonibona maduze.”
FUNDA NALA | Alicaci ikusasa likaSirino kwiChiefs
Leli qembu kumanje lilungiselela ukuqala kwesizini ngasekupheleni kukaFebhuwari kanti lizovula ngomdlalo onzima neHouston Dynamo.
ZITHOLE ZISHISA: Cofa lapha usithole kwiWhatsApp Channel yethu
