Izintwana zeBucs zivulele obhuti indlela, ezeStellies zabaphindiselela
Iqembu labafana abasebancane be-Orlando Pirates elidlala kwiDStv Diski Challenge (DDC) ‘selivulele obhuti balo indlela’ ngokushaya iMamelodi Sundowns.
Emdlalweni walesi sigaba sabadlali abasathuthukiswa ngaphansi kwePSL, iPirates ibhaxabule iSundowns ngo 5-1.
Lo mdlalo bewungoMgqibelo ekuseni kanti bewuhanjelwe wusihlalo weSundowns, uThlopie Motsepe nezinkakha zeqembu oTeko Modise noHlompho Kekana.
ISundowns yiyo elishaye kuqala igoli ngonyawo lukaXavier Jodamus kwabe seyizithintele kweZimnyama, zabuya sezithelwe ngezibonkolo.
USeth Green ushaye amabili, kwathi amanye ashaywa ngo-Oscar Gqeke, Vempi Masilela, noJoy Manana.
Lo mphumela uqinisekise ukuthi iPirates iyaqhubeka nokuqhwakela kwiligi yalesi sigaba.
Lezi zintwana zidlala nje obhuti bazo nabo bazokhiphana inkani emdlalweni weBetway Premiership ngawo uMgqibelo ngo-3.30 ntambama.
Nakhona lezi zinkunzi zibambene ngobhongwane – iSundowns iqhwakele kanti iPirates isendaweni yesithathu kodwa bahlukaniswe amaphuzu amathathu.
Komunye umdlalo, abafana abancane beStellenbosch FC bona baphindiselele obhuti babo ngokushaya iMarumo Gallants ngo 3-0.
FUNDA NALA | UCardoso ukhala ngabalimele kwiDowns
IGallants ishaye iqembu elikhulu leStellies ngo 4-0 emdlalweni weCarling Knockout ngoLwesithathu.
Kweminye imiphumela, iDurban City ibambane ngo 1-1 neKaizer Chiefs, kwathi ITS Galaxy yashaya iSekhukhune United ngo 2-1, iSiwelele yashaya iGolden Arrows ngo 3-0.
