I-Orlando Pirates eqhulwini – owoSuthu ubonga ukuvika ihlazo
Ibuyele emgqigqweni wokunqoba ngesitayela i-Orlando Pirates ibhudluza AmaZulu ngo 3-0 emdlalweni weBetway Premiership.
Lo mdlalo obuse-Orlando Amstel Arena ngoMgqobelo ntambama uqale ngegiya eliphezulu, kucaca ukuthi amaBhakabhaka afuna ukunqoba nakanjani.
Nebala kuyiwe ekhefini esehaba phambili ngamagoli oYanela Mbuthuma no-Oswin Appollis.
URelebohile Mofokeng wegeze elesithathu le-Orlando Pirates esiwombeni sesibili kanti ubuye wahlulwa yiphenathi ebizokwenza abe mane amagoli.
Umqeqeshi woSuthu, usole udonga lwakhe lwasemuva ngokugqobhozeka kalula, wabonga unozinti ngokubavikisa ihlazo lembudlu yamagoli.
“Leyo yinkinga yethu endala… Esikhathini esiningi sizithola sisendaweni engasifanele,” kusho uZwane.
“Esinye sezizathu ezenza ngidlale ngezitobha ezintathu zamaphakathi nenkundla yingoba uma beza bebane uba senkingeni.
“Kodwa ke izitobha zethu azisheshi ngokwanele. Wonke amabhola adlalwa ngemuva ayabahlula.
“Lokho kuvumela imbango ukuthi izenzele umathanda,” kuqhuba yena.
Uqhube wathi ubonga unozinti wakhe u-Olwethu Mzimela obavikise ihlazo ngokuvimba amanye amabhola abesezihlulile izitobha.
“Kumele sincome unozinti ngoba ngale kwalokho ngabe singenelwe amagoli ngendlela ebizoba yihlazo elibi,” kwenzega lo mqeqeshi.
Ukunqoba kwe-Orlando Pirates kuyibuyisele eqhulwini la izihola khona ngephuzu elilodwa.
Nokho ihlezi ngesinqe esisodwa njengoba uma inqoba iMamelodi Sundowns kwiRichards Bay ngesonto elizayo izobuyela phezulu.
