Ele-EPL ‘liqhudelana’ neChippa ngokushintsha abaqeqeshi
Udaba nguNjabulo Shezi
Iqembu eligijima kwi-English Premier League (EPL) iNottingham Forest selimemezele uSean Dyche njengomqeqeshi walo omusha.
Lo mqeqeshi oneminyaka engu-54 uzovala isikhala sika-Agne Postecoglou ofakwe amasondo ngempelasonto.
UDyche usengumqeqeshi wesithathu ukuqeqesha leli qembu selokhu kulale isizini ka2025/26, kanti lisemncintiswaneni neChippa United yakuleli esiqashe owesine.
UPostecoglou ukuguzwe nje ubesahlale izinsuku ezingu-39 engumqeqeshi waleli qembu le-EPL.
Uxoshwe ngoMgqibelo ngemuva kwemizuzu engu-17 kuphele umdlalo wabo neChelsea la benenebulwe khona ngo 3-0.
UPostecoglou uhamba nje izinto bezingezinhle neze njengoba enganqobanga ngisho owodwa umdlalo kweyisishiyagalombili. Wadlala ngokulingana kwemibili, waxetshulwa kweyisithupha.
Yena wayethathe izintambo kuNuno Espirito Santo, owaxoshwa emveni kwemidlalo emithathu iqalile isizini.
Kumanje iForest ihlezi endaweni ka-18 njengoba isanqobe umdlalo owodwa kweyisishiyagalombili, nokuyisiqalo esingesihle neze.
Umdlalo wokuqala kaDyche njengomqeqeshi weForest kuzoba ngowe-Uefa Europa League abazowudlala ekhaya neFC Porto yasePortugal.
“Ungumqeqeshi ohloniphekile nonesipiliyoni kwi-EPL, njengomdlali oke wadlalela emazingeni aphansi kwiNottingham futhi okhulele endaweni.
“Siyakholwa ukuthi ukuqonda kangcono okudingwa yiqembu nabalandeli ngokunjalo nosikompilo lwethu,” kusho iForest esitatimendeni.
“Ukuqokwa kwakhe kubeka ngokusobala injongo yethu yokufaka ingcindezi yokuphumelela kuyona yonke imincintiswano, eyasekhaya neyase-Europe.”
FUNDA NALA | Inkakha ifuna abanye abadlali nabo balwele ukungena kwiBafana
UDyche oke waqeqesha i-Everton wakwazi ukudlala imidlalo engu-79, wanqoba engu-21, wadliwa engu-31 wasedlala ngokulingana engu-23.
