Cardoso: Okumele kwenziwe uRibeiro ukungena kweleBrazil
Umqeqeshi weMamelodi Sundowns uMiguel Cardoso useveze abona kuzomele kwenziwe umdlali wakhe, uLucas Ribeiro ukuze abe sethubeni lokungena eqenjini lesizwe laseBrazil.
UMiguel Cardoso uthi uLucas Ribeiro Costa kumele adlale ezingeni eliphezulu kuneBetway Premiership ukuze abizwe eqenjini lesizwe.
ULucas Ribeiro usefomini ephezulu kule sizini. Uhamba phambili ngokushaya amagoli kwiBetway Premiership ngamagoli angu-13. Wakhele nozakwabo ayisikhombisa.
Lokhu kudlala kwakhe sekuke kwaqubula izingxoxo zokuthi kumele iBafana Bafana imthathe.
Kodwa zisheshe zaphela njengoba uHugo Broos avele wawuchitha lowo mqondo, wathi banele abadlali baseNingizimu Afrika.
Yize enza kahle kwiSundowns, kuvela ukuthi eBrazil akaziwa kwakwaziwa futhi akubonakali eseduze nokuthi abizelwe eqenjini lesizwe.
UCardoso ukholwa ukuthi lo mgadli kumele adlale kumaligi amakhulu ukuze angene eqenjini leSelecao.
“Ufuna ngiphendule ngokuchibiyela noma ngikhulume iqiniso?,” Kubuza uCardoso.
“Uma nginikeza impendulo yokuchibiyela, ngingasho ukuthi kuyadabukisa ukuthi akekho eqenjini laseBrazil.
“Ungumdlali ongcono kakhulu kwiligi, onekhono eliphezulu, futhi lokho kuyiqiniso.”
UMiguel Cardoso ube esedlulela eqinisweni langempela ngesimo sikaLucas Ribeiro nokungena kwiSelecao.
“Kodwa ukuze adlalele iBrazil, kumele azibonakalise kwelinye izinga. Abadlali bayo basemaqenjini amakhulu emhlabeni.”
UCardoso uvume iSundowns njengelinye lamaqembu aphezulu e-Afrika kodwa wathi uRibeiro kumele adlulele kwenye iligi.
“Ngokungangabazeki, unamandla. Ngiyakholelwa kuye. Ngiyakujabulela ukusebenza naye.
“Kodwa ngisebenze noDouglas Costa, uLuiz Adriano, noFernandinho (baseBrazil) phambilini.
“ULucas unamandla, kodwa kufanele akufakazele ezingeni eliphezulu kunaleli lokho.”
