I-PSL isiqinisekise eyedili leCarling Knockout eThekwini
IPremier Soccer League (PSL) isiqinisekise ngokusemthethweni izinsuku, izinkundla, nezikhathi zemidlalo eyandulela owamanqamu kwi-Carling Knockout — yonke imidlalo izoba seThekwini.
Yomibili le midlalo ihlelelwe impelasonto yomhla ka-8 no-9 kuNovemba ka-2025, okunikeza abalandeli esifundazweni umbukiso othokozisayo okufanele ukuthi bawubheke ngabomvu.
Amathikithi aqala ukudayiswa ngoLwesihlanu (Novemba 31) kusukela ngo-4 ntambama ezitolo ze-Open Tickets ezweni lonke futhi abiza u-R80 lilinye.
Abalandeli bayanxuswa ukuthi bawathenge kusenesikhathi ukuze babe yingxenye yesasasa elikhulayo le-Carling Knockout eThekwini.
Umdlalo owandulela owamanqamu wokuqala okuzobhekana kuwo iRichards Bay FC ne-Orlando Pirates useMoses Mabhida Stadium eThekwini ngoMgqibelo, kaNovemba 8 ngo-3 ntambama.
NgeSonto likaNovemba 9, iGolden Arrows izobhekana noMarumo Gallants eKing Zwelithini Stadium eMlazi – nawo izoqala ngo-3 ntambama.
FUNDA NALA | Okusha kwelePirates neLupopo
I-PSL ithi ukuqala kwemidlalo ngo-3 ntambama kwenzelwe ukuvumela abalandeli ukuthi bakwazi ukuya emidlalweni kalula.
Yomibili le midlalo ithembisa iminyakazo ewugesi ezinkundleni ezigcwele phama njengoba lamaqembu amane elwela indawo kowamanqamu we-Carling Knockout.
