Busathenjwa ubuholi buka-Arthur Zwane kuMaZulu
AmaZulu FC asenze isimemezelo esibalulekile ngekusasa lika-Arthur Zwane kule kilabhu.
UZwane ujoyine Usuthu ngasekupheleni konyaka odlule, ezosebenza ngokubambisana noVusumuzi Vilakazi.
Laba bobabili bathathe indawo kaPablo Franco Martin ngemuva kokungahambi kahle kwezinto ekuqaleni kwesizini.
UMartin uxoshwe ngemuva kokuhlulwa imidlalo emithathu kulandelana.
UZwane noVilakazi nabo baqale uhambo lwabo ngokuhlulwa yiStellenbosch FC kwiCarling Knockout ne-Orlando Pirates koweligi.
Ukunqoba kwabo kokuqala kuqhamuke ngesikhathi bebhekene neChippa United abayishaya ngo 2-0.
NgoFebhuwari uVilakazi wesulile esikhundleni sakhe, washiya uZwane ephethe ngokwakhe ngokugcwele.
Kusukela lapho uZwane usehole iqembu emidlalweni eyisishiyagalolunye.
Ngaphansi kobuholi buka-Arthur Zwane, AmaZulu anqobe imidlalo emithathu, adlala ngokulingana kwemibili, ahlulwa kwemine.
Kodwa umenagmeli woSuthu, uSandile Zungu useveze ukuthi uyawubona umehluko ofike noZwane, wamelulela inkontileka.
Lesi simemezelo usikhiphe ngesikhathi kunesithangami sabezindaba lapho AmaZulu abethula khona ubudlelwano bawo obusha nePrimo Sports.
UZungu uncome umthelela kaZwane kuMaZulu kusukela efikile kuleli qembu.
“U-Arthur Zwane uzobe esekhona kuMaZulu ngale kwale sizini,” kusho uZungu kwabezindaba.
“Sikholwa ukuthi wenze umsebenzi oncomekayo ekubuyiseleni ubuqotho eqenjini.”
UZungu wengeze ngokuthi imizamo kaZwane ifanelwe ukuhlonishwa.
“Sicabanga ukuthi udinga ukuklonyeliswa ngokwethembeka okukhulu yithi.
“Leso sinqumo sidluliselwe kuye, abadlali, nalo lonke ithimmba asebenza nalo labaqeqeshi.”
UZwane utuswe ngokwenza ngcono ubuqotho nokuziphatha kwabadlali enkundleni.
Ubuholi bakhe busize ekuqiniseni iqembu ngesikhathi somkhankaso onzima.
AmaZulu manje anethemba lokuqeda isizini esendaweni enhle. Ukuba khona kukaZwane kuletha uzinzo nombono wekusasa.
Iqembu likholwa ukuthi uyindoda efanele ukuliholela phambili.
Njengoba inkontileka yakhe seyeluliwe, uZwane usezoqala ahlelele isizini ezayo.
