Bamgeze inhliziyo uHugo Broos abafana abancane kwiBafana
Kufanele ukuthi uHugo Broos ujabule futhi angase aphathwe yikhanda uma eseqoka isikwati sakhe esilandelayo esizodlala eyokuhlungela iNdebe yoMhlaba.
Lokhu kungenxa yokuthi abadlali abaqoke emidlalweni emibili yobungani neTanzania neMozambique kumele ukuthi bamhlabe umxhwele.
Lo mqeqeshi weBafana Bafana ukhethe iqembu elinabadlali abaningi abasebancane futhi iningi labo ebeliqala ukudlala ngaphansi kwakhe.
Lokhu kungenxa yokuthi abadlali beMamelodi Sundowns, abajwayele ukuba baningi kwiBafana bebengatholakali kule midlalo.
Emdlalweni wokuqala neTanzania ngoLwesihlanu, idlale ngokulingana ngo 0-0.
NgoLwesibili ebusuku ishaye iMozambique ngo 2-0 – yomibili imidlalo ibisePeter Mokaba Stadium ePolokwane.
UHugo Broos usebenzise amaqembu ahlukene eBafana Bafana kuyo yomibili le midlalo, futhi womabili adlale kahle naphezu kwemiphumela ehlukene.
Emdlalweni wangoLwesibili, iBafana isheshe yacacisa ukuthi iyakufuna ukunqoba kulokhu.
Ibizimisele ukujika izinto ngemuva kokudlala ngokulingana neTanzania.
Abadlali ababili be-Orlando Pirates uRelebohile Mofokeng noMohua Nkota bafike bephindelela epalini lika-Ivane Urrubal weMozambique.
UMofokeng uthole ithuba elihle ngomzuzu ka-17 ngemuva kokubekelwa elihle ibhola uYanela Mbuthuma weRichards Bay.
Leli bhola likhiphe uMofokeng wabhekana ngqo no-Urrubal kodwa lo nozinti waphika, walivimba ibhola lakhe.
Yize enze izinguquko ezingu-11 emdlalweni wabo odlule, iBafana ithwale kanzima ukuthola amagoli esiwombeni sokuqala.
USinoxolo Kwayiba, weChippa United, ubeke iBafana Bafana phambili ngomzuzu ka-47, engofela enethini ibhola ebeligotshwe uNkota kade kuyikhona.
UNkota uphinde waba nesandla egolini lesibili. Uvimbe iMozambique izama ukwakha umnyakazo isuka emuva.
Udle ibhola qede walibeka phambi kuka-Ashley Cupido – lo mgadli omude akabange esathandabuza, walinamathisela enethini.
