Ngabe seluqalile uqhekeko nakwiDurban City?
Kubukeka buzosheshe bubile lobu obuxoviwa uFarook Kadodia kwiDurban City njengoba bobabili oGavin Hunt no-Ernst Middendorp bengamaqhalaqhala nje.
Ukufaka lezi zinkunzi ezimbili esibayeni esisodwa okwenziwe ngulo sihlalo weDurban City ngenye yezinto ezimangaze abalandeli ngesikhathi kulungiselelwa isizini.
IDurban City ibuyise uMiddendorp ukuba azoba ngumphathi wezokuqeqesha eqenjini njengoba beyihlela kabusha ithimba layo labaqeqeshi.
Ibe seyidedela uSimo Dladla, yalanda uGavin Hunt – ongumqeqeshi onamava kunabo bonke kwiPSL – ukuba azoba ngumqeqeshi.
Yize siqondakala isizathu sokulandwa kukaHunt, esikaMiddendorp esingaqondakali kahle.
Ngokujwayelekile ebholeni lakuleli, umphathi wezokuqeqesha kusuke kungumuntu obekelwe ukugada umsebenzi, elindele ukuthatha uma umqeqeshi ephikwa yimiphumela.
Ngesikhathi iCity idlala umdlalo wayo wokuqala neTS Galaxy, uMiddendorp wabonakala eqobela phansi okuthile ehlezi ezihlweleni.
Ngokubika kweSportswire, uHunt uvele washaya ngamafuphi uma ebuzwa ngalokhu – okuyinto vele adume ngayo lo mqeqeshi uma imibuzo imxaka.
Ubuzwe nangokudlelwano babo, kwazise uHunt nguye owangena esikhundleni ngemuva kokuthi uMiddendorp exoshwe ngendlela engamgculisanga kwiKaizer Chiefs eminyakeni embalwa edlule.
“Asinalutho, mina ngisebenza ngabadlali, yena wenza akwenzayo,” kuphendula lo mqeqeshi.
Uma ebuzwa ngolwazi oluqoqwa uMiddendorp emidlalweni ukuthi usuke ezolusaphi, uthe, “Angazi.”
FUNDA NALA | UMokwana uyojoyina uNkota eSaudi
Ube esecindezelwa uHunt, kubuzwa ukuthi ngabe lolu lwazi ayeluqoqa uMiddendorp ulwethulile yini kuye ngaphambi komdlalo wesibili.
Nokho uvele wazihlekela inhlinini nje wabe esethi, “Ngiyabonga madoda,” wabe esezishiya kanjalo izintatheli.
Ngaphansi kukaHunt, iDurban City isayinqobe yomibili imidlalo yayo futhi yiyo eqhwakele kwilogi.
