AmaZulu akhiphe ‘iqhina embizeni’ ngoTshepang Moremi
AmaZulu FC akuqinisekisile ukuthi asesamukele isicelo se-Orlando Pirates sokudayiselwa umdlali wasesiswini uTshepang Moremi.
Lokhu kuqede ukuqagela ngokuthi lo mdlali osheshayo wasophikweni uzojoyina iziqhwaga zaseSoweto.
ILisenethini nokho ibike yabika ngesonto eledlule ukuthi uTshepang Moremi usesayinile kwi-Orlando Pirates.
Usuthu luqinisekise ngoLwesihlanu ukuthi abaphathi balo banqume ukusamukela isicelo sePirates ngalo mdlali ongomunye wababaluleke kakhulu.
“Sifisela uTshepang okuhle kakhulu njengoba eqala isahluko esisha emsebenzini wakhe,” kusho umqondisi wezemidlalo kuMaZulu uPedro Dias.
UTshepang Moremi ubevele ekade ‘esekuinisekisile’ ngeziphansi ukuthi uzothuthela kwiPirates ngawo uLwesihlanu ezinkundleni zokuxhumana.
Lo mdlali oneminyaka engu-25 ubudala ufake isithombe sakhe esengumfana omncane egqoke izimpahla zePirates.
Yize engashongo lutho kulesi sithombe, kodwa kuvele kwacaca ukuthi usehlulekile ukuzibamba njengoba kufezeke iphupho lakhe lokudlalela iqembu akhule engumlandeli walo.
Khonamanjalo Usuthu luthembise abalandeli balo ukuthi abaphathi basebenza ngokuikhandla ukuletha abadlali abafanele abazovala izikhala zabahambayo.
Phela leli qembu liqinisekise ukukhululwa kwabadlali abangu-19, okuhlanganisa ababili abebebolekiwe noTshepang Moremi oya kwiPirates.
“Njengengxenye yemizamo eqhubekayo yokuqinisa iqembu, AmaZulu asebenza kanzima ukwakha iqembu eliqinile elizoncintisana kahle kumasizini azayo.
“Ezinye izimemezelo mayelana nokusayinwa kwabadlali abasha zizokwenziwa ngokuhamba kwesikhathi,” kusho Usuthu.
