UKhune ushaya amakhala ngoWilliams, umxayisa ngengozi
Owayengunozinti weBafana Bafana, u-Itumeleng Khune, usezwakalise ukukhathazeka kwakhe ngo-Ronwen Williams.
Uthi ukhathazekile ngendlela uWilliams adlale ngayo ngesikhathi iBafana ishaya i-Eritrea ngo-5-0 emdlalweni wokuhlungela i-Afcon ka-2027.
IBafana iqale umdlalo kanzima njengoba i-Eritrea ibicindezela emizuzwini yokuqala, kwaphoqa uWilliams ukuthi avimbe amabhola abebukeka eyingozi.
UKhune ukholwa ukuthi uWilliams kumele agweme ukuzethemba ngokweqile, njengoba amaphutha akhe engase amlahlekisele ngendawo yakhe eqenjini.
“Bekunovalo ekuqaleni ngoRonwen,” kusho uKhune kwiSABC Sport la asengumhlaziyi khona.
“Nasesiwombeni sesibili bengikhathazekile kancane. Ngicabanga ukuthi kwesinye isikhathi uzethemba ngokweqile, bese kuba yilapho enza khona amaphutha.”
U-Itumeleng Khune uphinde wakhumbuza u-Ronwen Williams ukuthi kukhona uSipho Chaine olinde ithuba lakhe.
“Kumele akususe lokho ngoba mhlawumbe ubethatha izimbangi kancane,” kuqhuba uKhune.
“Ekugcineni, uma udedela igoli kanjalo, kukhona uSipho Chaine olinde ithuba.”
UKhune uphinde wagxeka esinye isenzo sikaWilliams asibone singesihle.
“Ubengagxilile emdlalweni. Esikhundleni sokuphakamisa ibhola phezu kwepali, ubanikeze ithuba,” kuqhuba yena.
- FUNDA NALA | UMosimane ukhala ngeshwa lika-Aubass
Nokho, naphezu kwalokho, iBafana inqobe ngo-5-0, uRelebohile Mofokeng washaya amagoli amabili, kwathi uSphephelo Sithole, u-Iqraam Rayners noLuther Singh nabo bashaya elilodwa.
- EZISHISAYO| Cofa lapha usithole kuWhatsApp
