Umunyu uThabiso Monyane evalelisa ‘ekhaya’ kwiPirates
Ufane nengane eshiya ikhaya uThabiso Monyane ngesikhathi esevalelisa kwi-Orlando Pirates ebiyikhaya kuye iminyaka engu-13.
UThabiso Monyane, ongumdlali wasemuva okhululwe yi-Orlando Pirates muva nje, usevalelise ngokusemthethweni kuleli qembu.
Lo mdlali oneminyaka engu-25 ubudala ubbhale umlayezo onomunyu ezinkundleni zokuxhumana kulandela isimemezelo sokukhululwa kwakhe.
UThabiso Monyane uphakathi kwabadlali abane abadedelwe yi-Orlando Pirates, okukhona kubo uPaseka Mako, u-Innocent Maela noMiguel Timm.
“Njengoba ngivala lesi sahluko sempilo yami, ngigcwele ingxube yemizwa,” kubhala uMonyane.
“Ngizwa ukudabuka ngokushiya okuwukuphela kwekhaya lebhola engake ngalazi, kodwa futhi nginesasasa ngohambo olusha oluzayo.”
UThabiso Monyane ujoyine i-Orlando Pirates eneminyaka engu-12 futhi wakhuphuka kusukela ezinhlakeni zenkulisa waze wafika eqenjini elikhulu.
Ngokuhamba kweminyaka, udlale imidlalo engu-95 eqenjini elikhulu futhi wanqoba izindebe eziningi neqembu.
Ubonge abalandeli, ithimba labaqeqeshi, abasebenzi, nosihlalo ngokumeseka kulo lonke uhambo lwakhe neZimnyama.
“Kubalandeli, ngiyabonga ngokungeseka kwenu okungenamkhawulo. Injabulo yenu, ingoma, nothando lwenu…”
Umlayezo wakhe osuka enhliziyweni uwuphethe ngokubonga: “Ngiyabonga, Orlando Pirates, ngeminyaka engu-13 engasoze yalibaleka.”
Yize umnyakazo olandelayo kaMonyane ungakaqinisekiswa, imibiko iveza ukuthi kunikezwe iKaizer Chiefs ithuba lokumsayina.
Lokhu kwenzeke nangaphambi kokuthi iPirates iqinisekise ukuthi ayisamdingi eqenjini layo.
Futhi, njengoba esengumdlali onamava, ekubeni eseneminyaka engu-25 nje kuphela, mancane amathuba okuthi angasheshi ukulithola elinye iqembu.
Ukuhamba kwakhe kwiPirates kuyishiye inoBandile Shandu, uDeano van Rooyen noThabiso Lebitso emuva kwesokudla.
