UZwane uvikela ‘izintwana’ zakhe’ uthembisa impi koweChippa
Njengoba isizini yeBetway Premiership isifinyelela kuvuthondaba, AmaZulu FC athembisa ukulwa kuzo kuyovalwa ngebutho layo labafana abancane.
Sekubhekwe entanjeni manje kanti umqeqeshi woSuthu u-Arthur Zwane uncome iqembu lakhe ngokunikela ngakho konke kuze kube manje.
Ugcizelele ukuthi “ibutho lakhe elincane” likwazile ukukhomnbisa isibindi emkhankasweni onzima.
“Lesi sikwati besiqhudelana namaqembu aye emakethe athenga abadlali ababizayo,” kusho uZwane kuleli sonto.
“Le kilabhu kufanele ibathakasele laba badlali. Mina, njengomqeqeshi wabo ngiyabazisa kakhulu laba badlali.
“Ngakho-ke okuzokwenzeka ukuya phambili ukuthi sizonikela ngakho konke, sifuna ukunqoba yonke imidlalo yethu esele.
“Asazi ukuthi kuzokwenzekani, kodwa sizibheke thina. Asikhathazekile ngamanye amaqembu.
“Asifuni ukuthembela kwamanye amaqembu ukuthi asenzele ufefe. Siyakwazi ukuzilwela, sike sakwenza phambilini.”
AmaZulu abhekene nesivivinyo esinzima kulo Mgqibelo njengoba evakashelwe yiChippa United eMoses Mabhida Stadium – umdlalo uqala ngo-3 ntambama.
IChilli Boys ize eThekwini iwalambele ngokwehlukile amaphuzu njengoba ilwela ukusuka ezindaweni zezembe.
AmaZulu abophele kanje (4-4-2): Mzimela – Allan, Hanamub, Mzobe, Fielies – Zikhali, Ngcobo, Hlangabeza, Bern – Mbanjwa, Maqokolo
Ebhentshini: Ofori, Gustavo, Dube, Slatsha, Mhlongo, Mashigo, Kutumela, Mathloko, Moon
