Uzoshuba umbango wendawo yesithathu kuMaZulu neStellies
IStellenbosch FC naMaZulu FC bazokhiphana inkani emdlalweni omqoka weBetway Premiership ngoLwesibili eDanie Craven Stadium.
Lo mdlalo uzoqala ngo-7.30 ebusuku. Womabili la maqembu alwela ukuqeda kwamathathu aphezulu kwilogi.
Ukunqoba kweStellenbosch kuzoyenza ikhuphukele endaweni yesithathu ngamaphuzu angu-38, idlule iSekhukhune United.
Ukunqoba kwaMaZulu kuzowagxumisa aye endaweni yesihlanu, abe ngaphezu kweStellies.
IStellies iya kulo mdlalo inomfutho. Inqobe ngo 1-0 ibhekene neziqhwaga zase-Egypt iZamalek koweCaf Confederation Cup ngesonto eledlule.
Umqeqeshi uSteve Barker ufuna ukwakhela kuleyo mpumelelo futhi aphushele ukuphinda aqede endaweni yesithathu.
AmaZulu nawo angena kulo mdlalo ngokuzethemba. Ashaye iRichards Bay ngo 1-0 emdlalweni wawo wokugcina.
Umqeqeshi u-Arthur Zwane unethemba lokuthi uzoyiqeda ngamandla isizini.
Ukholwa ukuthi iqembu lakhe lisangayithola indawo yesithathu uma liyinqoba yonke imidlalo yalo esele.
Ngaphezu kwalokho, AmaZulu azobe ebheke ukuziphindiselela. IStellies iwabhabhadise ngo 5-0 emzuliswaneni wokuqala kule sizini.
KuBarker, abadlali abafana no-Ashley Cupido noChumani Butsaka babalulekile. Bobabili basefomini enhle kakhulu.
Usuthu luzothembela kuRowan Human noTshepang Moremi, nabo abadlala kahle kakhulu muva nje.
iStellenbosch izobe ibheke ukuqhubeka nomgqigqo ukuze iye nawo emdlalweni owandulela owamanqamu weConfederation la izobhekana khona neSimba SC ngeSonto.
- AmaZulu abophele kanje: Ofori – Sikhakhane, Hanamub, Mphahlele, Feilies – Brooks, Moremi, Zungu, Motswari – Thabede, Kambindu
- Ebhentshini: Mothwa, Gumede, Mthethwa, Ngobeni, Mbanjwa, Ekstein, Human, Mashigo, Ighodaro
- IStellies yona ibophele kanje: Masuluke – Enyinnaya, Basadien, Toure, Moloisane – Barns, Jebaar, Khiba – Lekoloane, Nku, Cupido
- Ebhentshini: Langevelt, Mcaba, Mini, Nduli, Mdaka, De Jong, Phili, Titus, Palace
