Usuthu lucathanyelwa inkinga yonozinti zisuka nje
AmaZulu FC angase azithole esenkingeni yonozinti njengoba isethenjwa esinamava, uRichard Ofori esephinde walimala kabi.
Lo nozinti odabuka eGhana uneshwa lokulandelwa wukulimala, okuyinto eyamphazamisa nakwi-Orlando Pirates – iqembu abekulo ngaphambi kokujoyina Usuthu.
Umqeqeshi waMaZulu, u-Arthur Zwane ukuqinisekisile ukuthi u-Ofori uzohlala okungenani isonto noma amabili engadlali.
Lokhu kungenxa yokuthi uselashwa kulandela ukulimala akuthole emdlalweni wabo wokuqala ngempelasonto edlule.
U-Ofori usale egcwele igazi futhi elimele kabana ngesikhathi behlulwa yiStellenbosch kwMTN8 eCape Town Stadium ngeSonto eledlule.
Ukulimala kwenzeke ngesikhathi uSanele Barns weStellenbosch eshayisana no-Ofori ngephutha, wamshiya elimele ebusweni.
Lo nozinti owake waba ngukaputeni weqembu lesizwe laseGhana kuphoqeleke ukuba aphume, kungene u-Olwethu Mzimela endaweni yakhe.
Usuthu lwagcina luhlulwe ngo 3-2 kulo mdlalo, laliwasha kanjalo ijezi kulo mqhudelwano wokuqala ohlelweni lwemidlalo yesigaba esiphezulu sePSL.
UZwane ukuqinisekisile ukuthi u-Ofori uzophuthelwa umdlalo wabo wokuqala weBetway Premiership abazowudlala ne-Orbit College.
Umdlalo uhlelelwe ukuthi ube sePrincess Magogo Stadium KwaMashu ngoMgqibelo ngo-3 ntambama.
Lokhu kulimala ekhanda kuka-Ofori kungokwesibili emasontweni ambalwa njengoba wathinteka nakwiKZN Premier’s Cup.
FUNDA NALA | IChiefs ‘ibiyishela isiqome kwenye indawo’ kuBasadien
UZwane uzwakalise ukukhathazeka – kufanele – ngalesi simo salo nozinti obukeka enokhondolo olubi lokulimala kabi.
“Uma eqhubeka nokuthinteka kabi kanjena, kungagcina kunomonakalo omkhulu, ngakho sicophelele ngaye,” kusho uZwane.
Ngaphandle kuka-Ofori AmaZulu ahlome ngoDarren Johnson emsayine esuka kwiChippa United noMzimela ezintini.
Kusazobonakala ukuthi ngubani phakathi kwalaba ababili uZwane azomethemba emdlalweni we-Orbit College.
