Usevumbuke kwelaseThekwini uFabisch obekhonjwa kwiChiefs

Umdlali waseZimbabwe okuke kwavela ukuthi uzosayina kwiKaizer Chiefs, u-Jonah Fabisch usesayine kwelaseThekwini.

Lo mdlali oneminyaka engu-24 ubudala ujoyine iGolden Arrows ngenkontileka yesikhathi eside.

UFabich ufike eNingizimu Afrika ngoJulayi ngemuva kokushiya iqembu laseGermany, i-Erzgebirge Aue, kanti ubefunwa ngamaqembu amaningi ePSL.

Ngokombiko weFARPost uFabisch waqala wachitha izinsuku ezimbalwa eThekwini ngaphambi kokubuyela e-Europe eyocubungula kahle akufunayo.

Ekuqaleni kuthiwa ubengafuni ukushiya e-Europe njengoba ayenazo nezinye izicelo ezivela emaqenjini angaphandle.

Kodwa iGolden Arrows igcine iwunqobile umjaho wokusayina lo mdlali, njengoba ibifuna ozovala isikhala esishiywe ngu-Isaac Cisse.

Lo mdlali wasesiswini usanda kujoyina iqembu laseBelgium, iRC Sporting Charleroi.

Kubikwa ukuthi u-Jonah Fabisch uzobuyela eNingizimu Afrika ezinsukwini ezimbalwa ezizayo ukuze aqale impilo yakhe entsha KwaZulu-Natal.

AmaZulu FC, iStellenbosch FC, iKaizer Chiefs neSekhukhune United nawo kuvela ukuthi ake abonisa intshisekelo ngalo mdlali.

• FUNDA NALA | Seziqhathiwe kweyeCaf

U-Jonah Fabisch uyindodana kamufi uReinhard Fabisch, umqeqeshi waseGermany owake waqeqesha iMamelodi Sundowns namaqembu esizwe aseZimbabwe naseKenya.

• EZISHISAYO| Cofa lapha usithole kuWhatsApp