USeema uvula isifuba ngokubanjiswa udonga
- Alfred Ngubane
ULehlohonolo Seema uvula isifuba ngokuhamba isigubhukane emaqenjini amabili awaqeqeshile ngaphambilini okuyiChippa United neSekhukhune United.
Engxoxweni abe nayo neLisenethini, uSeema uveze ukuthi abaphathi balamaqembu amabili badlala ngaye bengazigcini izithembiso.
“Uyazi uma uqashwa kuba nezethembiso ngezinto okumele uzizuze nangezinto abaphathi okumele bakwenzele zona,” kusho uSeema.
“Laba baphathi balamaqembu bangithembisa izulu nomhlaba ngombandela wokuthi ngenze umsebenzi wabo ngendlela.
“NjengakwiChippa nje, ngayihlenga ezembeni njengalokho engangiqashelwe khona, kodwa kwathi uma sekumele ngithole umhlomulo walokho, ayangaphuma imali.”
Kuzokhumbuleka ukuthi uSeema washiya isigubhukane nakwiPolokwane City ngesikhathi eyojoyina iSekhukhune United.
Ngaleso sikhathi nakhona kwiBabina Noko wayethenjiswe izulu nomhlaba, kodwa ekugcineni wahamba eseyiqaqa, izethembiso zingafeziwe.
Njengamanje uSeema akaqashwe ndawo futhi uthe ngeke akwazi ukuphawula ngamahlebezi okuthi uzobuyela kwiGolden Arrows ake wasebenza kuyo phambilini.
OLUNYE UDABA: UTovey usola uNabi ngokushaya isikhala zisuka nje
I-Arrows isale ingenamqeqeshi kulandela ukushiya isigubhukane kukaSteve Komphela obuyele kwiMamelodi Sundowns.
