Yadl’eMnyama! IPirates iqoqe izindondo zePSL
Njengoba besanda kusonga isizini nezindebe ezintathu, ompetha abasha beBetway Oremiership i-Orlando Pirates baphinde bakhala bemuka nezindondo zikaMeyi.
Usomaqhinga waleli qembu, u-Abdeslam Ouaddou uklonyeliswe ngendondo yoMqeqeshi weNyanga, kwathi unozinti uSipho Chaine yena wadla eyoMdlali weNyanga.
UMqeqeshi weNyanga: Abdeslam Ouaddou (Orlando Pirates)
U-Ouaddou uthole umklomelo wakhe wesithathu woMqeqeshi weNyanga kulo mkhankaso ngemuva kokuhola amaBhakabhaka esigabeni sokugcina.
Unqobe emithathu, wadlala ngokulingana kowodwa emidlalweni emine.
Lokhu kuqinisekise ukuthi iPirates iyayinqoba iligi okokuqala eminyakeni engu-14.
U-Ouaddou ubeyibanga nomqeqeshi weMamelodi Sundowns uMiguel Cardoso no-Bernard Parker weTS Galaxy le ndondo.
UMdlali weNyanga: Sipho Chaine (Orlando Pirates)
USipho Chaine uthole umklomelo wakhe wokuqala ngqa woMdlali weNyanga ngemuva kokungangenelwa goli ngoMeyi.
UChaine usebenze kahle kakhulu ngoMeyi, engangenelwa goli emidlalweni emineilandelana.
Ngokwenza kanjalo, ubhale kabusha izincwadi zomlando wePSL, eqeda isizini ngokuqopha irekhodi elimangalisayo.
Leli rekhodi ngelokungangenelwa goli emidlalweni engu-21 kwisini eyodwa.
Igoli leNyanga: Bright Ndlovu (Sekhukhune United)
Ngesikhathi i-Orlando Pirates isusuluza izindondo, nomgadli weSekhukhune United uBright Ndlovu akasalanga.
UNdlovu uhambe nomklomelo weGoli leNyanga ngegoli alishaya ekude nepali bebhekene neSiwelele FC ePeter Mokaba Stadium ngoMeyi 23.
