UPitso Mosimane uveze umuzwa ngokuqeqesha i-Orlando Pirates
UPitso Mosimane usegcine ekhulumile ngamahlebezi okuthi ushelwa yi-Orlando Pirates.
Ungomunye wabaqeqeshi okubikwa ukuthi bafunelwa ukuvala isikhala sikaJose Riveiro ozohamba ekupheleni kwesizini.
Kodwa uPitso Mosimane ukuchithile ukuqagela ngokuthi angase ajoyine lezi zinkunzi zaseSoweto.
Lo mqeqeshi oke wasebenza kwi-Al Ahly neMamelodi Sundowns phambilini, usecacisile ngalamahlebezi.
“Ngiwabonile lawo mahlebezi. Akekho oke wakhuluma nami. Ngakho-ke, ngeke sikhulume ngelutho,” kusho uMosimane kwi-The South African.
“Sizobona. Okwamanje leli bheji (lePitso Mosimane Youth Football) lisho lukhulu kimi, ngaphezu kwanoma yiliphi elinye ibheji,” kuqhuba yena.
UPitso Mosimane useke wakhuluma phambilini ngendlela ayithanda ngayo i-Orlando Pirates futhi akuyona imfihlo ukuthi angathanda ukuyiqeqesha.
Yize okwamanje engenaqembu ngemuva kwengxabano yeholo ne-Esteghlal FC yase-Iran, uMosimane usegxile ezikoleni zakhe zebhola.
“Ngisekhaya, yebo, kodwa ngingasebenza. Kodwa kumelwe kube umsebenzi ofanele, kufanele kube yisikhathi esifanele,” kuqhuba yena.
UPitso Mosimane uthe okwamanje usagxile ekwethuleni izikole zakhe zebhola ezweni lonke.
“Ake ngakhe leli fa lami, ngoba uma sengiyekile ukuqeqesha abantu bazokhohlwa ngezindebe engiziwinile.
“Bheka ukuthi ngimatasa kangakanani, namuhla ngilapha, futhi ngiya kwesinye isikole maduze.
“Bengethula esinye eRustenburg ezinsukwini ezintathu ezedlule, ngimatasatasa ngampela.
“Angisiboni ngisho isikhala sokungabi senkundleni. Ngisenkundleni nsukuzonke nabaqeqeshi, ngibabhekile, ngiqinisekisa ukuthi benza okufanele.”
Igama lakhe uMosimane, nawabaqeqeshi aseke wasebenza nabo phambilini, oRulani Mokwena noManqoba Mngqithi ayavela kokuthiwa bafunwa yiPirates.
Nokho ukuthi ngubani ozothola lo msebenzi obukeka unzima kulandela impumelelo kaJose Riveiro kuzocaca ekupheleni kwesizini.
