UPercy Tau ubhodle ngangakuthandanga okwashiwo uBroos
Isihlabani seBafana Bafana, u-Percy Tau, sesibhodle ngesithi akuhlakanga kahle kuso okwake kwashiwo wumqeqeshi waleli qembu uHugo Broos.
Kunesikhathi lapho u-Percy Tau eke walahlekelwa umgqigqo wakhe, uHugo Broos wamkhipha eqenjini lakhe isikhashana.
Kungesikhathi lo mgadli oyinxele esagijima kwi-Al Ahly yase-Egypt, lo mqeqeshi waseBelgium wakhala ngokuthi isimo sengqondo yakhe asikho sihle.
Exoxa noRobert Marawa kwiMSW kuleli sonto, uTau uveze ukuthi kukhona izikhathi lapho abona sengathi uBroos useyadlulela kwakushoyo.
Lokhu ikakhulukazi kwenzeka ngesikhathi u-Hugo Broos ephawula ngezinsolo ezazivela kwabezindaba e-Egypt zokuthi u-Percy Tau unomzwangendwa.
“Uke wakhuluma izinto ezingazange zingithokozise, futhi ngamtshela lokho,” kusho uTau.
Uqhubekile wathi wakubeka kwacaca kuBroos ukuthi izindaba zempilo yengqondo azifanele ukukhulunywa ngazo ungazange uzwe kuqala kulowo muntu okhuluma ngaye.
“Ngamtshela ngathi: ‘Mqeqeshi, le ndaba yempilo yengqondo ibalulekile kakhulu. Ungadlaleli ngayo.
“‘Uma kukhona ofuna ukukwazi, ngicela ukhulume nami uqobo.
“‘Ungathathi izinto ozifunda kwezinye izindawo ngaphandle kokuqinisekisa nami,’” kuchaza uTau.
Lo mdlali lo oneminyaka engu-30 ubudala uthe iningi lezindaba ezazibhalwa ngaye ngesikhathi edlala kwi-Al Ahly zazingamanga.
“Okucishe kube ngu-90% kwalezo zindaba kwakungamanga. Iqiniso kwakuyizinto eziphathelene nomdlalo kuphela — amagoli, noma uma siwinile noma sihluliwe.
“Okunye konke kwakungamaqhinga nje abantu abhedayo engingazi babeqondeni ngawo,” kuqhuba yena.
UBroos waziwa ngokungathandabuzi nokungafihli lutho uma ekhuluma wabezindaba.
Yize ephumelele kakhulu neqembu lesizwe, amazwi akhe kwesinye isikhathi awathandwa yibo bonke abantu.
Ukukhuluma kukaTau kubeka obala ukuthi izindaba zempilo yengqondo zidinga ukuphathwa ngobuhlakani nesinono.
