UMoremi uveza usizo aluthola kuMaswanganyi efika kwiPirates
Umdlali wasesiswini we-Orlando Pirates, uTshepang Moremi, usevuleleke ngesiqalo sakhe esinzima kuleli qembu lakhe elisha.
Ngesikhathi efika, uTshepang Moremi wazithola engenzezi kahle okwenza abalandeli baqala ukushaya amakhala ngaye, futhi bamhhahhameza.
Kodwa manje usedalule ukuthi uzakwabo uPatrick “Tito” Maswanganyi wamsiza kanjani ukuthi angavumeli ukuthi lokhu kumxhile, kumphazamise.
Lo mdlali oneminyaka engu-25 ubudala ujoyine iPirates esuka kuMaZulu FC ngaphambi kwale sizini yeBetway Premiership ngemuva komkhankaso obemuhle kuye kuleli qembu laseThekwini.
Udlale imidlalo engu-31, washaya amagoli amane wabe esakhela ozakwabo ayisikhombisa ngesikhathi sakhe kuMaZulu.
Kodwa impilo kwiPirates ayizange iqale kahle. UMoremi ubhekane nokugxekwa emidlalweni yakhe yokuqala kulezi zinkunzi zaseSoweto.
Ekhuluma kwiBucsCamp, uvumile ukuthi ukwesekwa nguMaswanganyi yikona okwamsiza ukuthi adlule kulo bubi abhekana nabo efika.
“Ngemuva kwesigameko emidlalweni emibili yokuqala, uTito weza kimi wangitshela ukuthi naye wadlula entweni efanayo,” kusho uTshepang Moremi.
“Wangitshela ukuthi ngingayifaki enhliziyweni. Uthe abalandeli bazongithanda uma sengiqalile ukushaya amagoli nokusiza iqembu ukuthi linqobe.
“Wangikhumbuza ukuthi wonke umuntu unendlela yakhe nesigaba akuso empilweni, nokuthi akumele ngilahle ithemba.”
WINA | Ithuba lokuwina neVicks neLisenethini
Iseluleko sikaMaswanganyi sisebenzile. UTshepang Moremi usephenduke isethenjwa, washaya amagoli amahlanu futhi wakhela ozakwabo elilodwa kule sizini.
Isikhathi esimfake ezinhliziyweni zabalandeli yingesikhathi eshaya amagoli amabili kowamanqamu weMTN8 bedlala neStellenbosch FC eMbombela Stadium.
FUNDA NALA | UBroos akayizwa eyokungatshazwa kweBafana
Lamagoli akhe — nelikaTshegofatso Mabasa – asiza amaBhakabhaka aphakamisa isicoco sesine kulandela salo mqhudelwano.
Ukuqina kwalo mdlali osebenzisa onyawo lwesinxele nokuzethemba okukhulayo sekumenze intandokazi yabalandeli ngokushesha.
