Awaphesheya ayaqhubeka nokukhendla iPirates

I-Orlando Pirates ingase ilahlekelwe ngomunye wabadlali bayo ababalulekile njengoba sekunekilabhu yase-Europe esifake isicelo sokudayuselwa yena.
Kuvela ukuthi le kilabhu – igama layo elingakaveli – ifuna ukuthenga u-Oswin Appollis ngaphambi kokuvalwa kwewindi lokudayiselana ngabadlali.

Ngokombiko weThe Citizen, le kilabhu yase-Europe isisifakile isicelo esihehayo sokuthola lo mdlali weBafana Bafana, kanti iPirates kuthiwa iyasicubungula lesi sicelo.

Umthombo utshele leli phephandaba ukuthi akumele kumangaze uma u-Appollis eshiya iPirates ngaphambi kokuvalwa kwewindi.
Uthi kunentshisekelo enkulu ngalo mdlali futhi isicelo esivela eqenjini lase-Europe sesibekiwe etafuleni.

Kusolwa ukuthi le kilabhu kungase kube eyaseFrance, nakuba kungakacaci ukuthi iyiphi njengoba iPirates ibingafuni ukudalula imininingwane mayelana nezingxoxo.

U-Appollis wajoyina i-Orlando Pirates ngaphambi kwesizini ka-2025/26 esuka ePolokwane City.
Ube nesizini yokuqala enhle eSoweto, wasiza iBhakabhaka ukuthatha izindebe ezintathu, waphinde waqokwa njengeMidfielder of the Season kwiBetway Premiership.

Ukudlala kwakhe kahle kwaphinde kwamenza waba yingxenye yeqembu leBafana Bafana ebeliye kwiNdebe yoMhlaba ka-2026.
Lokhu kwenza intshisekelo yakhe e-Europe yanda, njengoba kuke kwabikwa ukuthi amaqembu afana neFC Porto ne-OGC Nice anentshisekelo kuye.

Uma iPirates ingasivuma lesi sicelo, u-Appollis angaba ngomunye wabadlali abaphezulu abazoshiya leli qembu baye phesheya kuleli windi.

Lokhu kuza ngemuva kokuthi iPirates isidayise uRelebohile Mofokeng noPatrick Maswanganyi emaqenjini aphesheya.

• FUNDA NALA | UDerbyshire uveza okubhajiswe iPirates koweChams League

• EZISHISAYO| Cofa lapha usithole kuWhatsApp