OweHope FC uveza akubheke kuZwane ambolekwe yiChiefs
Umqeqeshi weHope FC, uClayton Daniels, useveze umsebenzi omkhulu awubekele u-Samkelo Zwane ngemuva kokuqala kahle kwakhe kuleli qembu abolekiswe kulo yi-Kaizer Chiefs.
UZwane ushaye igoli elinqobe umdlalo ngomzuzu wesithupha ngesikhathi iHope FC ishaya iNorth West University ngo-1-0 ePotchefstroom ngoMgqibelo.
UDaniels uthi, nokho, okubaluleke kakhulu wukubuyisela uthando lwalo mdlali ebholeni.
“Uyigama elikhulu. Yebo, udinga ukusebenza ngokuqina komzimba, kodwa into ebaluleke kakhulu kimina nakuSamkelo ukuthi aphinde alithande ibhola.
“Ngifuna aphinde afunde ukujabulela umdlalo wakhe futhi adlale emamatheka,” kusho uDaniels.
Uthi ufuna uZwane athuthuke ekusebenzeni noma engaliphethe ibhola ukuze afinyelele ezingeni likaTeboho Mokoena weMamelodi Sundowns neBafana Bafana.
“Uma efuna ukuba ngumdlali wasesiswini ohamba phambili eNingizimu Afrika, kumele afunde ukudlala ngaphandle kwebhola. Kumele asebenzele iqembu.”
“UTeboho Mokoena angafinyelela ebhokisini elilodwa aphinde afinyelele kwelinye. Ngifuna uSamkelo naye afinyelele kulelo zinga,” kuqhuba uDaniels.
Umdlali usebenzisa leli thuba ukubuyisa ifomu ngemuva kokuthola imizuzu embalwa kuphela ngesizini edlule.
- FUNDA NALA | UCardoso uveza umbono wakhe ngoVan Rooyen kwiDowns
Ngesizini edlule, i-Kaizer Chiefs imbolekise kwiSiwelele FC u-Samkelo Zwane kodwa izinto zangahamba ngendlela ebilindelekile.
- EZISHISAYO| Cofa lapha usithole kuWhatsApp
