UMkhize weSafa eThekwini uncoma ‘ubusoka’ bukaBroos
Udaba ngu-Alfred Ngubane
Umengameli weSafa eThekwini, uMazwi Mkhize usephawule ngodaba lwemenja yeBafana Bafana uVincent Tseka, wancoma uHugo Broos ngokulukhuluma ngesisoka.
UTseka wasolwa kakhulu ngokuhlulwa wumsebenzi wakhe kulandela ukuthi engazange alazise ithimba labaqeqeshi ukuti uTeboho Mokoena umisiwe.
Lokhu kwenzeka ngesikhathi lo mdlali edlala kungafanele bebhekene neLesotho emdlalweni wokuhlungela iNdebe yoMhlaba ngoMashi.
Ngenxa yaleli phutha, iBafana yaphucwa amaphuzu amathathu, nokwenze yagcina seyingena sekuvalwe amehlo kwiNdebe yoMhlaba.
Yize kubukeka iSafa ingeke imhlawulise ngaleli phutha uTseka, abalandeli basafuna izimpendulo.
Ebuzwa uvo lwakhe ngale ndaba ngesikhathi ehambele ukwethulwa kweSiyakhula Cup, uMkhize uthe bazolinda ikomkhulu ukuthi lenza njani ngayo.
“Khona wudaba lolo olusazokhulunywa phezulu, ngakho njengesifunda seSafa mhlawumbe kumele silinde,” kusho uMkhize.
“Khona ngeke siphike ukuthi akubanga yinto enhle. Kodwa ke umqeqeshi uHugo Broos wakhulumisa okoMzulu ngalento.
“Wavele wathi bonke baphakathi kulento: nguye, yiphini lakhe, uTseka naye umdlali uqobo.
“Uthi kumele bonke basolwe ngokuthi yini eyadala ukuthi bengakukhumbuli ukuthi umdlali unamakhadi amabili aphuzi.
“Wathi akungasolwa uTseka yedwa – angazi-ke noma wayenzela ubumbano eqenjini yini. Kodwa wakhulumisa okoMzulu impela.
“Wathi nje cha akukwazi ukuthi kungakhonjwa umuntu oyedwa ngenjumbane, bona babekuphi kwenzeka yonke lento.”
FUNDA NALA | U-Ouaddou ayimthusi eyomqansa obhekene neBucs kwiLupopo
Umengamelo weSafa, uDanny Jordaan wathi bona sebedlulile kuleyonto ngoba vele iqembu ligcine likwazile ukungena kwiNdebe yoMhlaba.
