UMiguel Cardoso uphoxwe abalandeli beSundowns
Umqeqeshi weMamelodi Sundowns, uMiguel Cardoso, usale ephoxekile ngemuva kokudlala ngokulingana ne-Al Ahly.
Kodwa akubanga nje kuphela ukuthi iqembu lakhe alikwazanga ukushaya igoli kulo mlenze wokuqala obalulekile weCaf Champions League.
Okumphoxe kakhulu wukugqoza kwabalandeli eLoftus Stadium ngoMgqibelo ntambama.
UMiguel Cardoso ubelindele umdlalo onzima futhi ecabanga ukuthi abalandeli beMamelodi Sundowns bazovela ngobuningi ukuzobeseka.
Kodwa izihlwele bezimbalwa, futhi lokhu akuzange kuhlale kahle kulo mqeqeshi odabuka ePortugal.
ISundowns yehlulekile ukudiliza udonga lwasemuva lwe-Al Ahly, yize ibidlala ekhaya.
I-Al Ahly, eyaziwa ngokudonsa kanzima uma idlala eNingizimu Afrika, ikhombise inhloso futhi beyihlasela iphindelela kulokhu.
Kodwa ukukhungatheka okukhulu kukaMiguel Cardoso bekungewona umphumela.
“Ngijabule ngokwesekwa esikutholile,” kusho uCardoso ngemuva komdlalo.
“Kodwa kuyadabukisa ukubona umdlalo owandulela owamanqamu weChampions League enezihlalo eziningi kangaka ezingenamuntu kuzo.”
Ugcizelele ukuthi abalandeli bangaliphakamisa kanjani iqembu emidlalweni enzima.
“ECairo, bazoba nabalandeli abangu-90 000. Lokho kunikeza iqembu labo amandla kusukela umdlalo uqala uze uyophela.”
UMiguel Cardoso ucele izwe lonke ukuthi sisukume seseke amakilabhu aseNingizimu Afrika kule midlalo yeCaf.
“Akufanele kube abalandeli beSundowns nje kuphela. Yonke iNingizimu Afrika kufanele ibe ngemuva kwethu, iPirates, neStellenbosch emidlalweni yeCaf,” kuqhuba yena.
Ubalule ukuthi yindawo engemuva kwebhentshi lakhe kuphela ebigcwele abalandeli kulo mdlalo.
“Isibalo sabalandeli asizange sifane nezinga lalo mdlalo,” kwengeza uCardoso.
Lo mqeqeshi unxuse abalandeli ukuthi baphume ngobuningi emidlalweni ezayo.
“Siyawadinga amandla abo, ikakhulukazi emidlalweni emikhulu. Wonke umuntu ubalulekile – abadlali, abaqeqeshi, nabalandeli.”
ISundowns izobhekisa amabombo eCairo emlenzeni wesibili ozoba ngoLwesihlanu oluzayo eCairo International Stadium.
Kungenzeka badlale phambi kwezihlwele ezigcwele phama njengoba i-Al Ahly ivunyelwe ukuvula yonke inkundla kulo mdlalo.
