U-Ouaddou ucacisa ‘eyokukhathala’ ayisho kuphela isizini
Umqeqeshi we-Orlando Pirates, u-Abdeslam Ouaddou, usecacise ngamazwi awakhuluma ekupheleni kwesizini edlule ngesikhathi ethi akanasiqiniseko ngokuthi uzobuya yini.
Ngemuva kokuhola iPirates yanqoba isicoco seBetway Premiership ngesizini ka-2025/26, u-Ouaddou wathi ukhathele kakhulu, okwadala ukuqagela ngokuthi angase ashiye iqembu.
Ekhuluma nowayengumdlali wePirates, uMichael Morton, ekhempini yeqembu eSpain, u-Abdeslam Ouaddou uthe wayekhuluma iqiniso ngendlela ayezizwa ngayo ngaleso sikhathi.
“Ngibe nesikhathi esimnandi ngesikhathi sekhefu,” kusho yena ngokuphumula ngesikhathi kuvalwe isizini.
“Bengivele ngikhuluma iqiniso. Bengikhathele ngoba ukuqeqesha iqembu elikhulu elinabalandeli abamangalisayo kunzima futhi kudinga amandla.
“Wonke umuntu uyakwazi lokho. Angiqondi ukuthi kungani abanye bekuthola kunzima ukukholwa ukuthi nomqeqeshi angakhathala.
“Kodwa konke sekulungile. Sengibuyile futhi sengiwavuselele ngokugcwele amandla ami. Angikho ku-100%, sengiku-2 000%.”
Ngemuva kokuphela kwesizini, kwabikwa ukuthi u-Ouaddou ufunwa amaqembu aseNyakatho Afrika nase-Europe. Nokho, ugcizelele ukuthi yena akaze acabange ngokushiya iPirates.
“Ngifunde imibiko eminingi ethi nginezithembiso zemisebenzi eNyakatho Afrika nase-Europe,” kengeza yena.
“Kodwa abantu kumele baqonde ukuthi ngingumuntu othembekile. UMpumi, uNkosana nobaba wabo (u-Irvin Khoza) banginike ithuba lokuqeqesha iqembu elikhulu kangaka.
- FUNDA NALA | UMakgopa noMabasa kwabafunwa eTurkey
“Lelo thuba alinikezwa noma ngubani nje. Ngibahlonipha kakhulu, futhi kufanele ngihlale ngithembekile kubo nakubalandeli bethu.”
Njengoba esebuyile u-Abdeslam Ouaddou, manje sekubhekwe aqhubeke la egcine khona ngesizini edlule.
- EZISHISAYO| Cofa lapha usithole kuWhatsApp
