UMiddendorp uhlambuluka ngokukhuhlisa uScara Ngobese ibhentshi
Ngesikhathi efika okokuqala kwiKaizer Chiefs, u-Ernst Middendorp wahamba engasemuhle kubalandeli ngokungadlalisi uScara Ngobese.
Lo mdlali – ongasekho emhlabeni – wayengomunye wababengaconsi phansi kubalandeli beChiefs ngaleso sikhathi.
Lo mqeqeshi waseGermany usehlambuluke ngokuthi kungani wayephoqeka ukumkhuhlisa ibhentshi lo mdlali owayedumo ngomjiko owawuchwazisa izihlwele.
UMiddendorp usesebenze amalandla amabili eNaturena phakathi kuka-2005 kuya ku-2007 no-2018 kuya ku-2020.
Ehlandleni lakhe lokuqala, waphenduka iqaqa kubalandeli ngenxa yokukhihlisa uScara Ngobese ibhentshi.
Ngaphambi kokuthi uMiddendorp athathe izintambo kuTed Dumitru ongasekho, uScara wayengomunye wabadlali abahamba phambili kwiPSL.
Ikhono lakhe lemvelo lokugila abadlali basemuva yilo elamenza intandokazi yabalandeli.
Ekhuluma kwiCar Wash 2.0 Podcast muva nje, uMiddendorp uveze uhlangothi lwakhe.
Ukhombe uguquko olwalwenzeka eqenjini ngaleso sikhathi, ethi yilo olwaphoqa ukuba ajike indlela okudlalwa ngalo
Uhlonze ukuhamba komgadli owayeqavile ngaleso sikhathi uCollins Mbesuma njengomthelela omkhulu wokuthi kujikwe indlela yokudlala.
“Kwisizini eyandulela leyo, konke kwakuhamba kahle. Kwakunamagoli, kudlalwa kahke futhi uScara naye efaka isandla,” kuchaza uMiddendorp.
“Kodwa-ke, lapho lolo esengasekho lo mgadli owayeshaya amagoli, iqembu kwadingeka lishintshe ukwenza.
“Uma ulahlekelwa umdlali oshaya amagoli amaningi kangako, awukushintshi kalula lokho. Kufanele uthole izixazululo.
“Kwakungasamele sidlalele ukuzijabulisa; kwakumele sibe nesakhiwo esihlukile, esigxile ekusebenzeni kwawo wonke umdlali.”
Ngokusho kukaMiddendorp, lolo shintsho lwalufuna amaqhinga amasha adinga wonke umdlali azikhandle, okufaka naye uScara Ngobese.
“Kufanele usebenzise ikhwalithi yakho ngendlela efanele, ukuya phambili ngenhloso futhi usize iqembu lithole amagoli,” kuqhuba yena.
UMiddendorp uvumile ukuthi ukuphatha uguquko olunjalo kwakungelula, ikakhulukazi njengoba okwenzeka ngaphakathi kungaqondakali kwabangaphandle.
“Kunzima kakhulu kumqeqeshi ngoba akekho obona izinto ngendlela oyibona ngayo,” kuqhuba uMiddendorp.
“Uma imiphumela ingemihle… udinga ukuqina nokuzethemba ukuze unamathele emibonweni yakho.”
Uphethe ngokugcizelela ukuthi ezingeni eliphezulu, indlela yokudlala yomdlali ngamunye kumele ihambisane nesakhiwo seqembu.
“Uma umdlali efuna ukwenza izinto ngaphandle kokulandela uhlelo lweqembu, alikho ithuba lakhe,” kuphetha yena ngalolu daba.
