IKaizer Chiefs ishwebise izimbangi ibophelela isihlabani sayo
Kubikwa ukuthi iKaizer Chiefs isiqinisekise ikusasa lomunye wabadlali bayo abasebancane othembisayo ngokumnika inkontileka egcwele.
Amakhosi asesayinise u-Aden McCarthy inkontileka yakhe yokuqala yeqembu elikhulu njengoba kade esadlala ngeyeqembu lenkulisa.
Ngokubika kweSoccerBeat, lo mdlali wasemuva oneminyaka engu-22, usayine ngoLwesibili, ezibophezela kwinkontileka yeminyaka emibili.
Le nkontileka nokho ihambisaa nombandela wokwelula kwayo ngomunye unyaka uma izinhlangothi zombili zivumelana.
Kuvela nokuthi le nkontileka iphinde ibe nesigatshana sokukhululwa uma kwenzeka kuvel amaqembu amfunayo lo mdlali.
Kusukela ekhushulelwe eqenjini elikhulu kwiKaizer Chiefs, uMcCarthy ubonakalise ukuba ngumdlali onekusasa elihle.
Kumanje usengemunye wabayizethenjwa emuva, nokuyikho okubonakala kujabulise abaphathi baze babona kumele bamnike inkontileka engcono.
Lesi sivumelwano siphawula ingqophamlando ebalulekile emsebenzini walo mdlali osemncane njengoba ebheke ukuzibonakalisa kuMakhosi.
Khonamanjalo, akukacaci ukuthi uMcCarthy uzobe ekhona yini uma iKaizer Chiefs seyibhekene ne-Orlando Pirates ngeSonto.
Lo mdlali ukhishwe ngohlaka emdlalweni odlule waMakhosi la ebambane khona ngo 0-0 nePolokwane City ngempelasonto edlule.
