IStellies ishwabula ngokufudukiswa koweChiefs

IStellenbosch FC ngeke isingathe umdlalo wayo olandelayo weNedbank Cup neKaizer Chiefs eWestern Cape.

Leli qembu likuqinisekisile ukuthi linqatshelwe ithuba lokuwudlalelaa ekhaya lo mdlalo.

Lithi lokhu kungenxa yokungatholakali kwenkundla nokushayisana kwemidlalo.

I-Stellies ibisikwazile ukuthola inkundla, i-Athlone Stadium ngeSonto likaMashi 9 ukuthi kudlalelwe kuyo lo mdlalo.

Kodwa esitatimendeni esikhishwe yileli qembu ngoLwesihlanu, lithe isicelo sayo sokuba lo mdlalo udlalwe ngeSonto sichithiwe.

Imithetho yeFifa idinga izinsuku ezimbili ezigcwele phakathi kwemidlalo enkundleni.

Manje njengoba iStellenbosch izobhekana ne-Orlando Pirates kuyo le nkundla Mashi 11, ibingeke ikwazi ukudlala neChiefs ngoMashi 9.

Le kilabhu ithi izamile ukuyisa ukucela ukuthi umdlalo wayo nePirates uhlehliselwe uMashi 12, iPSL nePirates benqaba.

Ezinye izinkundla zaseKapa bezingatholakali ngalolu suku lwalo mdlalo wayo neChiefs.

I-Athlone Stadium izosingatha umqhudelwano webhola lombhoxo ngoMashi 7 kuya ku-8.

I-DHL Stadium yona ibhukhelwe i-Cape Town Cycle Tour Expo.

I-Danie Craven Stadium, okuyinkundla yeStellies yasekhaya, yona ayikavunyelwa ukubamba imidlalo yamaqembu amakhulu ngenxa yezinkinga zokuphepha.

Njengoba ingasekho enye inkundla ebingayisebenzisa ekhaya, iPSL ithathe lo mdlalo yawusa eNelson Mandela Bay Stadium.

Lo mdlalo, osuvele ususe isasasa eGqeberha, uzoba ngoMgqibelo, kaMashi 8, kanti uzoqala ngo-6 ntambama.