UMcKenzie ushaye uMama Joy nge‘shibobo’ ngeNdebe yoMhlaba
Ungqongqoshe wezemidlalo uGayton McKenzie usethathe isinyathelo okungenzeka simcike nakakhulu umlandeli omkhulu webhola kuleli uJoyce “uMama Joy” Chauke.
UMcKenzie usezibophezele ekutholeni abaxhasi abazimele abazohambisa abalandeli ukuyokweseka iBafana Bafana kwiNdebe yoMhlaba eMexico, Canada nase-US.
UMama Joy ubesematheni ngempelasonto ngokuxabana kwakhe nalo ngqongqoshe amsole ‘ngokuzonda’ abalandeli.
Lokhu bekulandela ukuvela kokuthi umnyango wezemidlalo ngeke usabaxhasa abalandeli ukuyokweseka iqembu lesizwe.
UMama Joy – obekucaca ukuthi udinwe ugane unwabu – ungene kwi-X ezwakalisa “Kubo bonke abalandeli e-SA asivele sikhohlwe yiNdebe yoMhlaba. U-@GaytonMcK ongu-@MinisterMcK kwa-@SportArtsCultur ngeke akwazi ukusisiza.
“Sisele dengwane. Ake sithandazele ukuthi umengameli asinike ungqongqoshe omusha wezemidlalo ozothanda abalandeli,” kubhala uMama Joy kwi-X.
NgoMsombuluko, uMcKenzie ube esethembisa ukuthola abaxhasi abambalwa abangakwazi ukusiza abalandeli baye kwiNdebe yoMhlaba ngoJuni.
“Ngicabanga ukuthi kufanele ikilabhu ngayinye iqoke umlandeli othembekile eqenjini ukuthi abe sohambweni oluya kwiNdebe yoMhlaba,” kubhala uMcKenzie kwi-X.
“Kufanele kube ngumuntu ongavamile ukuphuthelwa yimidlalo. Ngizoqala ukuthinta abaxhasi…”
Kuyacaca ke ukuthi uMama Joy uzoshaywa ngesithende kulolu hlelo uma lwenzeka njengoba okwamanje engenaqembu alilandelayo kuleli.
Wayekade egxume washiya umkhumbi we-Orlando Pirates waya kwiRoyal AM ngesikhathi kusungulwa leli qembu eminyakeni embalwa edlule.
Kodwa leli qembu ebeliholwa ngusomabhizinisi waseThekwini uShauwm Mkhize lihlakazwe yiSARS ngonyaka odlule.
UShauwn Mkhize ube esethenga iMbanane Highlanders eSwatini, kanti uMama Joy ube esemlandela khona.
