Ulijike kakhulu uJose Riveiro eleBucs kowe-Arrows

U-Jose Riveiro ulishintshe ngendlela ebingalindelekile iqembu elizoqala umdlalo we-Orlando Pirates neGolden Arrows.

I-Orlando Pirates ibhekene neGolden Arrows emdlalweni weBetway Premiership eMoses Mabhida Stadium, eThekwini ngoLwesibili ebusuku. Uqala ngo-7.30 ebusuku.

AmaBhakabhaka azongena kulo mdlalo elinye iso libheke umdlalo wangoMgqibelo kuyo le nkundla yodumo.

Izodlala nezimbangi zayo ezindala iKaizer Chiefs kowamanqamu weNedbank Cup kanti uJose Riveiro ube nezinqumo ezinzima obekufanele azenze. 

Ngaphezu kokuthi uJose Riveiro vele akanabo oNkosinathi Sibisi noThalente Sibisi abamisiwe, unabadlali abathathu abahlezi emakhadini amathathu aphuzi. 

UPatrick Maswanganyi, uRele Mofokeng noTapelo Xoki sebeqoqe amakhadi aphuzi amathathu ngamunye, futhi uma kukhona othola elinye kowe-Arrows, uzophuthelwa owamanqamu.

Futhi ngenkathi uMaswanganyi noXoki bezoqala kulo mdlalo wangoLwesibili, uJose Riveiro unqume ukumshiya ngaphandle uMofokeng.

Lokhu kuzosebenza njengezinyathelo sokumvikela ekumisweni kowamanqamu, kuphinde kumnike ikhefu alidingayo lo mdlali osemncane.

Lo mdlali oneminyaka engu-20 ubudala ohlaselayo usedlale cishe yonke imidlalo yePirates kule sizini. 

UJose Riveiro uphinde waphumuza unozinti uSipho Chaine ongomunye wabadlale yonke imidlalo ngaphandle kwabelimele noma emisiwe kuyo.

Endaweni kaChaine kungene uMelusi Buthelezi. URiveiro uphinde wanikeza omunye umdlali osemncane, uYanga Madiba umdlalo wakhe wokuqala kwesokunxele emuva. 

UKarim Kimvuidi noBoitumelo Radiopane bazoqala kulo mdlalo futhi kuzodingeka basebenze kanzima ukuze bazibonakaliseukuze bagcine izindawo zabo emidlalweni ezayo. 

Ebhentshini kukhona abanye abadlali abasebancane abathathu oSiyabonga Dladla, uSimphiwe Selepe, uMohau Nkota noSiyabonga Ndlozi. 

• FUNDA NALA | Busathenjwa ubuholi buka-Arthur Zwane kuMaZulu

UNkota yena ubesevamise ukuyiqala imidlalo kodwa naye unikwe ikhefu, kwaqala uKimvuidi endaweni yakhe.

• SIBAMBE NAKU-FACEBOOK | Lisenethini.co.za 

NoDeon Hotto usale ebhentshini, kwangena uBandile Shandu endaweni yakhe eqenjini eliqalayo.

• I-Arrows ibiphele kanje kulo mdlalo (4-3-3): Maova – Cele, Matlaba, Jiyane, Zwane – Msomi, Dlamini, Kobedi – Sibiya, Mthanti, Ndwandwe

• Ebhentshini: Watenga, Van Rooi, Sithole, Phillips, Masuku, Malinga, Maxwele, Nxadi, Lukhele

• IPirates yona ibophele kanje (4-3-3): Buthelezi – Madiba, Van Rooyen, Mbokazi, Xoki – Maswanganyi, Dlamini, Makhaula – Shandu, Kimvuidi – Radiopane

• Ebhentshini: Dladla – Selepe, Ndlozi, Nkota, Mako, Maela, Mabasa, Makgopa, Hotto