ULekwane uveza okuphazamise umgqigqo kaRele Mofokeng
Inkakha ye-Orlando Pirates u-Aubrey Lekwane isivikele isihlabani esisesincane uRelebohile Mofokeng ekugxekweni abhekene nakho.
Lokhu kulandela ukugxekwa kwalo mdlali ngokungadlali kahle ngesikhathi behlulwa ngo 2-1 yiMamelodi Sundowns.
URele Mofokeng ungene kulo mdlalo esemgqigqweni omuhle kulandela ukushaya amagoli amathathu emidlalweni emithathu.
Nokho akakwazanga ukuba nomthelela kulo mdlalo obalulekile obuseFNB Stadium ngoLwesithathu.
Nokho, uLekwane — owayedume ngelikaSense of Knowledge — ukholwa ukuthi iphutha libe kubadlali obekumele bamphakele amabhola.
Uphinde wabeka icala kumqeqeshi, emsola ngokukhungathekisa uMofokeng ngokumshintshisa indawo adlala kuyo.
UDLALAPHI?
ULekwane uveze ukuthi isinqumo sika-Abdeslam Ouaddou sokubuyisela uMofokeng ophondweni ngemuva kokumthembisa ukudlala maphakathi nendawo.
Uthi lokhu kuwuphazamisile umgqigqo walo mdlali oneminyaka engu-20 ubudala.
“Umqeqeshi uzisholo yena ukuthi usenika uMofokeng indawo entsha yokudlala njengomdlali wasesiswini ohlaselayo.
“Kodwa kulo mdlalo umbuyisele endaweni yakhe yakudala wamdlala ophondweni,” kusho uLekwane kwiKickOff.
“Kuyamkhungathekisa umdlali kwesinye isikhathi. Njengomdlali, kufanele ube yingcweti endaweni yakho.”
ULekwane uyihlahlele kanje indlela iPirates edlale ngayo:
- Ukungaphakelwa amabhola: Bobabili uMofokeng no-Oswin Appollis bebephoqeleka ukuthi babuyele engxenyeni yabo ukuze bayolanda ibhola.
Lokhu kungenxa yokuthi abadlali basesiswini bebehluleka wukushaya amaphasi aya phambili. - Isipiliyoni v ithalente: ULekwane uxwayise ngokufaka ingcindezi enkulu kulo mfana njengoba esemncane.
“Awukwazi ukulindela ukuthi athwale iqembu… uzombulala umfana omncane.” - Isigaba sokukhula: Nakuba uMofokeng ‘elazi ibhola,’ uLekwane ugcizelela ukuthi usadinga isikhathi.
Uthi kusamele athole amava futhi aqine ngokomzimba nangokwengqondo okudingeka emidlalweni emikhulu.
INDLELA EBHEKE PHAMBILI
Ukuphawula kukaLekwane kuyisikhumbuzo sokuthi ngisho nentsha enekhono kakhulu idlala kahle ngokwesekwa yiqembu.
Njengoba iSoweto Derby isisemome, ingcindezi izoba ku-Ouaddou ukuthi anqume ukuthi uMofokeng umdlalisa kuphi.
Ingabe uRele Mofokeng unguNombolo 10 noma umdlali wasophondweni?
FUNDA NALA | UPhumlani Mkhize ukhala ngoMayo ongasizi ngalutho
ULekwane ukholwa ukuthi ukujikajika njalo ngendawo adlala kuyo kungase kuthikameze ukukhula kukaMofokeng.
