Ujatshuliswe wukusebenza kukaMudau oweDowns
- Intatheli yeLISENETHINI
Umqeqeshi weMamelodi Sundowns uManqoba Mngqithi ukuncomile ukubuya kukaKhuliso Mudau ngesikhathi benqoba ngo 2-1 beshaya iKaizer Chiefs.
UMudau ungene esuka ebhentshini ngesiwombe sesibili somdlalo weBetway Premiership obuseFNB Stadium ngoMgqibelo.
Ukungena kwakhe kuqinise iSundowns emuva, yakwazi ukuchitha imizamo yeChiefs yokubuya kulo mdlalo.
UMudau noTeboho Mokoena bebengekho emidlalweni yakamuva yeSundowns, okuyinto ethuse abaningi.
UMngqithi uzwakalise ukujabula ngoMudau ngemuva komdlalo, emncoma ngokungakhombisi ukuthi ubengadlali kwedlule.
“Bekumnandi ukuthi uMudau abuye,” kusho uMngqithi.
“Usazosisiza kakhulu. Ngicabanga ukuthi namuhla bekuyisikhathi esifanele sokumbuyisa.”
Lo mqeqeshi ugqamise izinga eliphezulu lokuvala emuva abafike kulo ngemuva kokungena kukaMudau.
“Ufakazele ikhwalithi yakhe. Uma sizivikela emuva, ungomunye wabadlali abahamba phambili,” kwengeza uMngqithi.
“Ezimweni la umdlali ebhekene nomunye ngqo, usezingeni lakhe yedwa.”
Njengoba uMudau esebuyile, sekubhekwe ukubonakala ukuthi uMokoena yena uzobuya nini.
UMngqithi usekusho kaningi phambilini ukuthi njengoba enekhwalithi nje yabadlali, akekho ozolithola kalula ijezi.
