UHunt ulinga iPirates ngomgadli amdinga kuMatsatsantsa
- Intatheli yeLISENETHINI
ISuperSport United igaqele umgadli we-Orlando Pirates uZakhele Lepasa ngaphambi kokuthi kuvalwe iwindi lokudayiselana ngabadlali.
ULepasa, oneminyaka engu-27, ulizwa ngendaba ijezi ngaphansi komqeqeshi wePirates uJose Riveiro.
Ungemuva kukaTshegofatso Mabasa kanye no-Evidence Makgopa okuyibo abavamise ukuba seqenjini eliqala imidlalo.
Ngokubika kwe-iDiski Times, njengoba uBradley Grobler elimele, umqeqeshi weSuperSport, uGavin Hunt, ubona uLepasa engaba yisixazululo.
ULepasa ujwayelene neSuperSport, uke wadlala kuyo izinyanga eziyisithupha ebolekisiwe ngesizini eyandulela edlule.
Uqale isizini edlule kwiBucs namandla, washaya amagoli angu-10 emidlalweni eyisithupha. Nokho-ke ukulimala kumenze kumphindisele emuva.
URiveiro wake wancoma uLepasa ngefomu yakhe kodwa wathi ukwakheka kweqembu kwenza kube nzima ukuthi abuyele eqenjini eliqala imidlalo.
UHunt ukholwa ukuthi ukuletha uLepasa kungase kuzuzise umdlali uqobo lwakhe, neqembu ngokunjalo.
ULepasa uzothola ukudlala njalo okuzomsiza ukuthi abuyele eqenjini lesizwe iBafana Bafana.
KwiSuperSport, uLepasa uzosiza nangokukhulisa abadlali abasebancane abahlaselayo.
Njengamanje, abagadli beSuperSport bahlanganisa abancane abangakabi namava okungoThabang Mahlangu, Lucky Muthewi, Siviwe Magidigidi, no-Orifha Maubelo.
Umgadli osesele nesipiliyoni nguTerrence Dzvukamanja, onomlando noLepasa ngesikhathi bendawonye kwiPirates.
Ukudlala ndawonye kukaDzvukamanja noLepasa bungaphinde bube nzima kakhulu.
ISuperSport izimisele ngokuqinisa phambili, kanti uLepasa angase abe yilokhu ekudingayo.
