UDlangalala uveza ubukhulu besikhala sikaMokoena kwiBafana
Umhlaziyi webhola odumile nowake waqeqesha kwiPSL, uZipho Dlangalala, useveze ukukhathazeka kwakhe ngokungabikho kukaTeboho Mokoena emdlalweni obalulekile weBafana Bafana neSouth Korea kwiNdebe yoMhlaba.
IBafana izongena kulo mdlalo wokugcina wesigaba samaqoqo ingenaye lo mdlali wasesiswini ngemuva kokumiswa ngenxa yamakhadi aphuzi.
UDlangalala uthi kuyamethusa ukubona abantu bekutathela phansi ukulahleka kukaMokoena ngesikhathi esibucayi kangaka.
“Kuyangidida ukubona abantu bengakunaki ukungabikho kukaTeboho Mokoena kulo mdlalo. Lokhu kufike ngesikhathi esibi kakhulu,” kusho uDlangalala.
Lo mhlaziyi uveze ukuthi u-Teboho Mokoena ungomunye wabadlali abanamava amakhulu eqenjini futhi ubaluleke kakhulu kwindlela i-Bafana Bafana edlala ngayo.
“Ungumdlali wesibili onemidlalo eminingi eqenjini. Uyingqayizivele ngoba useke wadlala kwiziNdebe zoMhlaba ezine ezihlukene.
“Ube kwiNdebe YoMhlaba yabangaphansi kuka-20 ngo-2017,” kuqhuba uDlangalala oseke wasebenza kwi-Orlando Pirates neMamelodi Sundowns.
“Waba kuma-Olympics ngo-2020, kwiFIFA Club World Cup ngo-2025 futhi manje usekwiNdebe yoMhlaba.”
UDlangalala uthi yize iqembu lingancikile kumdlali oyedwa, amaqembu aphumelelayo ahlale enabadlali abambalwa abenza umehluko.
“Akukho mdlali omkhulu kuneqembu, kodwa amaqembu amakhulu ahlala enomdlali oyedwa noma ababili abanethonya elikhulu enkundleni. Kithina lowo ngumuntu onjengoTeboho Mokoena.”
Ngesikhathi ebuzwa ngalolu daba, umqeqeshi weBafana uHugo Broos uvumile ukuthi ukungabikho kukaMokoena kuyinselelo enkulu.
“Kumele sivume ukuthi ukulahleka kwakhe kuyinto enkulu,” kuvuma uBroos.
“UTeboho ungumdlali osezingeni eliphezulu futhi uvamise ukunquma indlela esizodlala ngayo.
“Uphinde abe ngumholi ngaphakathi nangaphandle kwenkundla.”
Nokho lo mqeqeshi waseBelgium ulume wabuye waphephetha kuhle kwegungwane.
“Sinabadlali abangu-26 lapha futhi ngiyabethemba bonke. Sinokuzethemba okuphelele kulowo ozovala isikhala sakhe.”
Kodwa uDlangalala uthi yena ubengeke azame ukuthambisa isimo.
“Mina bengingeke ngilifihle iqiniso,” kuqhuba lo mqeqeshi.
“Ngabe ngiyavuma nje ukuthi siyamkhumbula, kodwa ngiphinde ngithi lokhu kuyithuba lomunye umdlali ukuthi aphakame asize iqembu.”
Uqhube wathi uBroos wayazi kahle ukuthi uzodinga abadlali abahlukene ngesikhathi ekhetha iqembu lakhe.
“UBroos ukhethe abadlali basesiswini abane ngoba ubenohlelo. Kodwa iqiniso lithi abadlali bahlukene.
“Ngibakhetha bonke ngoba ngiyabadinga, kodwa akekho ongaletha into efanayo naleyo elethwa uTeboho Mokoena.”
- FUNDA NALA | USeema ubalisa ngesimo seSiwelele ekhendlwe yiBucs
Njengoba i-Bafana Bafana ibheke umdlalo wokufa nokuphila neSouth Korea, umbuzo omkhulu uthi: Ngubani ozovala isikhala sika-Teboho Mokoena?
Okusobala nokungadingi mpendulo wukuthi iNingizimu Afrika idinga iqhawe elisha elizyithwala kulo mdlalo.
- EZISHISAYO| Cofa lapha usithole kuWhatsApp
