UMorgan Mammila nesikhundla esisha kwiChippa United

March 11, 2025 1 min read

Ubudlelwano be-Chippa United no-Morgan Mammila sebuthathe elinye igxathu.

Leli qembu lePSL elizinze e-Eastern Cape selimqoke njengomqondisi walo wezemidlalo wokuqala ngqa.

UMorgan Mammila usanda kubuyela kuleli qembu njengephini lesibili lomqeqeshi ngemuva kokushiya ngesizini edlule.

Manje, esikhundleni sakhe esisha, uzokwengamela ithimba labaqeqeshi, ukuhlonzwa kwabadlali, nokuthuthukiswa kwethalente labadlali abasebancane.

Umsebenzi wakhe uzohlanganisa nokuqinisa uhlaka lweqembu lenkulisa elidlala kwiDStv Diski Challenge.

Umqeqeshi uThabo September uzoqhubeka nomsebenzi wakhe nakuba sekunezinkinga zakamuva zokungenzi kahle kweqembu.

Uzoqhubeka nokusebenza nephini lakhe uMabhuti Khenyeza.

Njengamanje iChippa United ihlezi endaweni yesishiyagalolunye kwiBetway Premiership ngamaphuzu angu-22 emidlalweni engu-19.

Umdlalo wayo neRoyal AM, obuhlelelwe ukuba ngoLwesibili, uhlehlisiwe.

Lokhu kulandela ukuthi yonke imidlalo yeRoyal AM yamiswa kulandela ukufakwa kwayo ngaphansi kwe-Sars ngenxa yezinkinga zemali.

UMorgan Mammila unomlando omude ne-Chippa United. Ngo-2022, wathatha izintambo njengomqeqeshi oyinhloko futhi waba nomthelela osheshayo.

Ngaphansi kobuholi bakhe, leli qembu lawina imidlalo yeligi emine ilandelana okufaka nokushaya izinkunzi zebhola lakuleli iKaizer Chiefs.

Kodwa-ke, ngokuhamba kwesikhathi izinto zajika, wabuyiselwa esikhundleni sokuphatha ngaphambi kokuhlukana neqembu.

Ngo-2023, wabuya njengomqeqeshi oyinhloko kodwa waphinde washintshwa ngemuva kochungechunge lwemiphumela engemihle.

Naphezu kokudidizelisana kwayo noMammila, le kilabhu isaqhubeka nokumtholela indawo.

Umsebenzi wakhe omusha njengomqondisi wezemidlalo uphawula esinye isahluko ohambweni lukMorga Mammila ne-Chippa United.

Ukuthi ubuholi bakhe buzoletha uzinzo yini kule kilabhu yinto esiyobonakala ngokuhamba kwesikhathi.

Ukunikwa kwakhe lo msebenzi omusha kuqede namahlebezi okuthi ubuyiselwe ukuzodla umsebenzi kaThabo September.