UCardoso ucacisa eyekusasa likaLorch kwiSundowns
Umqeqeshi weMamelodi Sundowns, uMiguel Cardoso, usephumele obala waphawula ngekusasa elibukeka lingacacile likaThembinkosi Lorch.
Kunemizubo eminingi ngesimo salo mdlali wasesiswini ohlaselayo kuleli qembu laseTshwane.
ULorch, owayeyintandokazi yabalandeli kwi-Orlando Pirates futhi engumdlali obalulekile kwiBafana Bafana, uzithola esesimweni esingacacile eChloorkop.
Yize enenkontileka neSundowns, lo mdlali oneminyaka engu-30 ubudala okwamanje uziqeqeshwa yedwa futhi akabaliwe ezinhlelweni zikaCardoso zesizini ka-2025/26.
Lo mqeqeshi wasePortugal uqinisekisile ukuthi udaba lukaLorch lusingathwa ngaphakathi eqenjini futhi lusezandleni zabo kumanje.
Ubebuzwe ngesimo sikaLorch ngesikhathi ekhuluma nabezindaba ngemuva kokubhubhudla iRichards Bay ngo 4-0 emdlalweni weMTN8 ngeSonto ebusuku.
“Isimo sikaLorch sisukela esikhathini esidlule futhi indaba yakhe isingethwe futhi izoxazululwa yikilabhu,” kusho uCardoso.
“Ngokuhamba kwesikhathi, nizothola ulwazi olusesidlangalaleni — kodwa ngokookuma kwezinto njengamanje, akekho lapha eqenjini, lokho ngingakuqinisekisa.”
ULorch uchithe isizini edlule ebolekiswe eqenjini elikhulu laseMorocco iWydad Athletic Club, lapho ehlabe khona umxhwele emidlalweni yasekhaya neyezwekazi — ikakhulukazi ngesikhathi seFifa Club World Cup.
I-Wydad ibifisa ukumsayina unomphela, kodwa intengo ephakeme okuthiwa ibekwe yiSundowns iyona eqede lezo zingxoxo.
Manje, njengoba iWydad isihoxile, ukuqagela mayelana nokuthi uLorch uzoyaphi kuyaqhubeka.
Imibiko ikhomba ukuthi amaqembu asenyakatho ye-Afrika nase-Asia abheke asiqaphile isimo sakhe, njengoba lo mdlali ohlaselayo engomonye wabanekhono elihle elihambisana namava.
Yize engekho ezinhlelweni kwiSundowns okwamanje, uLorch usengumdlalo obalulekile — futhi noma yiliphi iqembu azophelela kulo kobe lihlabene.
Kodwa-ke, ikusasa lakhe lesikhathi eside kungenzeka lincike ekutheni noma yimaphi amaqembu anentshisekelo ayakwazi yini ukuhlangabezana nemali efunwa yiSundowns ngaye.
