Ubuso obusha uMosimane evula ikhasi elisha kwiBafana 

U-Pitso Mosimane useqalile ukubeka uphawu lwakhe kwi-Bafana Bafana, njengoba lo mqeqeshi omusha esememezele iqembu azohlunga isikwati sakhe sokuqala.

IBafana ibheke emidlalweni yokuhlungela i-Afcon ka-2027 kanti okugqame kakhulu kulolu hlu ukufakwa kobuso obusha.

Kuphinde kwabuyiswa nabanye abadlali ababengasekho eqenjini lesizwe ngaphansi komqeqeshi imdala. 

Phakathi kwamagama adonse amehlo kakhulu kukhona uLebone Seema, ongomunye wabadlali abasha abathole ithuba ngaphansi kukaMosimane. 

Lo mdlali wasemuva we-Orlando Pirates ube nesizini encomekayo, waze waqokwa njengeSitobha seSizini kwiBetway Premiership.

Kukhona noCemran Dansin, omunye umdlali wePirates osemncane othole ithuba lokukhombisa ukuthi unalo yini ikusasa eqenjini lesizwe. 

U-Pitso Mosimane uphinde wavulela uYanela Mbuthuma ithuba kubagadli be-Bafana Bafana, ikakhulukazi njengoba kukhona abalimele. 

Omunye umdlali omusha odonse amehlo nguRonaldo Van Neel weGolden Arrows, naye othole ukubizwa okokuqala eqenjini elikhulu lesizwe.

Kanti uPuso Dithejane, osedlala kwiChicago Fire e-US, naye uthole ithuba ngemuva kokwenza kahle kakhulu. 

Ukudlala kwakhe okuhlaba umxhwele kwiMLS kumenze waba ngomunye wabadlali abasha uMosimane afuna ukubabona eduze. 

ULebohang Maboe naye ubuyile kwi-Bafana Bafana. Lo mdlali weKaizer Chiefs uke wasebenza no-Pitso Mosimane ngesikhathi bekwiMamelodi Sundowns.

Kanti uCassius Mailula naye usebuyile eqenjini ngemuva kwesikhathi engabonakali. 

Lo mgadli weSundowns uzobe efuna ukusebenzisa leli thuba ukuze avuselele umsebenzi wakhe eqenjini lesizwe. 

Lolu hlu lukhombisa ngokusobala ukuthi uMosimane akafuni ukuchitha konke okwakhiwe nguHugo Broos, kodwa ufuna ukwengeza amandla amasha. 

Iqembu lisazogcina iningi labadlali abebeye eNdebeni yoMhlaba ka-2026, kodwa ukungabikhona kwabadlali abathile ngenxa yokulimala kuvulele abanye ithuba.

IBafana izoqala umkhankaso wayo wokuhlungela i-Afcon ibhekene neGuinea ekhaya ngoSepthemba 26.

• FUNDA NALA | U-Ighodaro nesethembiso esikhulu kwabeChiefs

Izobe seyilibangisa e-Eritrea. Izovala leli khefu lamazwe omhlaba ngomdlalo wobungani ne-Egypt ngo-Okthoba 4 eCairo. 

Isikwati esigcwele: 

Onozinti

Ronwen Williams (Mamelodi Sundowns); Sipho Chaine (Orlando Pirates) Ricardo Goss (Mamelodi Sundowns) 

Izitobha

Aubrey Modiba (Mamelodi Sundowns); Samukele Kabini (Molde Fk, Norway); Fawaaz Basadien (Mamelodi Sundowns); Kamogelo Sebelebele (Orlando Pirates) Thapelo Morena (Mamelodi Sundowns); Thabang Matuludi (Polokwane City); Olwethu Makhanya (Rangers FF, Scotland); Khulumani Ndamane (Mamelodi Sundowns); Ime Okon (Hannover 96, Germany); Lebone Seema (Orlando Pirates); Nkosinathi Sibisi (Orlando Pirates); Tshepo Mashiloane (Sekhukhune United) 

Abasesiswini

Teboho Mokoena (Mamelodi Sundowns) Lebohang Maboe (Kaizer Chiefs); Cemran Dansin (Orlando Pirates); Sphephelo Sithole (CD Tondela, Portugal); Bathusi Aubaas (Mamelodi Sundowns); Brooklyn Poggenpoel (Durban City)

Abagadli

Iqraam Rayners (Mamelodi Sundowns); Yanela Mbuthuma (Orlando Pirates); Lyle Foster (Houston Dynamo, US); Cassius Mailula (Mamelodi Sundowns); Oswin Appollis (Orlando Pirates); Puso Dithejane (Chicago Fire, US); Tashreeq Matthews (Mamelodi Sundowns); Relebohile Mofokeng (Royale Union Saint-Gilloise, Belgium); Themba Zwane (Mamelodi Sundowns); Ronaldo Van Neel (Golden Arrows); Thapelo Maseko (Copenhagen, Denmark) Tshepang Moremi (Orlando Pirates); Luther Singh (AAL Limassol, Cyprus); Shandre Campbell (KV Kortrik, Belgium)

• EZISHISAYO| Cofa lapha usithole kuWhatsApp