UCardoso noRibeiro baphinde bazidlela amahlanga kwezePSL
Umqeqeshi oyinhloko weMamelodi Sundowns uMiguel Cardoso nesihlabani sakhe uLucas Ribeiro baphinde bazidlela amahlanga ezindondweni zePSL.
Lokhu kungemuva kokunqoba kwabo izindodo zikaMeyi kwiBetway Premiership.
UMiguel Cardoso uqokwe njengoMqeqeshi weNyanga, kwathi uLucas Ribeiro wahamba nemiklomelo yoMdlali weNyanga noweGoli leNyanga.
Lokhu kungokwesithathu kule sizini ukuthi bobabili uCardoso noLucas Ribeiro badle lezi zindondo.
Ukunqoba kwabo lezi zindondo kuwuphawu olucacile lokungaguquki kwabo, ubuholi, negalelo labo ekwenzeni kahle kweSundowns emkhankasweni ka-2024/25.
Ukwenza kahle kwabo kube wukhiye ekusizeni amaBrazilians ukuthi avikele isicoco sawo seligi okwesishiyagalombili kulandelana.
Leli yirekhodi ebholeni laseNingizimu Afrika.
UMiguel Cardoso uhole iSundowns enyangeni enhle ngoMeyi, wayinqoba yonke imidlalo yayo emihlanu yePremiership.
Ikhono lalo mqeqeshi wasePortugal lokugcina ukuzinikela nokuziphatha kubadlali kuyo yonke isizini libe nomthelela omkhulu, ikakhulukazi esigabeni sokugcina sesizini.
Uhlule izimbangi abebanga nazo lo mklomelo, okuwumqeqeshi weRichards Bay FC uRonnie Gabriel, noJose Riveiro, osanda kushiya kwi-Orlando Pirates.
Ngakolunye uhlangothi, uLucas Ribeiro, uqhubekile nokuba yiphela endlebeni ezitibheni ezweni lonke ngobuchule bakhe bokuhlasela nokushaya amagoli amahle.
Ushaye amagoli amathathu ngoMeyi — elilodwa benqoba ngo 3-0 behlula iStellenbosch FC ngoMeyi 11, namabili benqoba ngo 2-0 bedlala neMagesi FC ngosuku lokugcina lwesizini.
Lo mdlali waseBrazil akagcinanga nje ngokudla indondo yoMdlali weNyanga.
Igoli lakhe lesibili bebhekene neMagesi — livotelwe njengebelivelele kule nyanga.
Sekungokwesithathu kule sizini uRibeiro ethola zombili lezi zindondo.
URibeiro ubencintisana nozakwabo u-Iqraam Rayners noMarcello Allende kulezi zindondo azidlile.
