UBooth uncoma uBroos — uphakamisa okukodwa akhathazeke ngakho
Owayengumdlali wasemuva weBafana Bafana uMatthew Booth usetuse uHugo Broos ngokubuyisela iNingizimu Afrika eNdebeni yoMhlaba yeFifa okokuqala kusukela ngo-2010.
Nokho le nsizwa eyayiyisihlabani seMamelodi Sundowns iphakamisa indawo eyodwa ebona sengathi lo mqeqeshi waseBelgium uyashoda kuyo.
UBroos ujoyine uhlu oluphezulu lwabaqeqeshi — oClive Barker (1998) noCarlos Queiroz (2002) — abafake iBafana kule ndumezulu yomqhudelwano.
Ompetha be-Afcon bango-1996 bagcina ukudlala kulo mqhudelwano bengosokhaya ngo-2010, kodwa abakaze badlulele esigabeni samaqoqo.
Njengoba uHugo Broos manje elungiselela ukuya e-USA/Canada/Mexico ngo-2026, uMatthew Booth ukholwa ukuthi unethuba elihle lokuopha umlando.
Kodwa ufisa sengathi ubengabavalelanga ngaphandle abadlali abadlala ngaphandle kwakuleli ezikwatini zakhe.
“Okukodwa ongakugxeka ngoBroos ukuthi akababheki kangako abadlali abaphesheya kwezilwandle,” kusho uBooth kwiFARPost.
“Kufanele aye naphesheya, ababuke, futhi abaqinisekise ukuthi nabo banetuba eqenjini lesizwe. Angicabangi ukuthi ukwenze ngokwanele lokho.”
Iqembu elikhona njengamanje leBafana ligcwele izihlabani ze-Orlando Pirates neMamelodi Sundowns — abakwazile ukuthola imiphumela emihle.
UBroos, ozothatha umhlalaphansi ngemuva kweNdebe yoMhlaba ka-2026, usevele wancoma iphini lakhe uHelman Mkhalele ukuba angene esikhundleni sakhe.
UBooth uthi uthemba ukuthi umqeqeshi olandelayo uzobheka bonke abadlali – futhi anikeze abadlali abangaphandle kwezwe ithuba elifanelekile.
“Ngemuva kuka-2026, ngingathanda ukubona umqeqeshi evulela nabangaphandle ithuba— aye e-Europe, abuke imidlalo ye-PSL, futhi aqinisekise ukuthi wonke umdlali ofanelekayo uyamnika ithuba,” kuphetha uBooth.
FUNDA NALA | UMakaab uxhilwe obesola uMoremi
IBafana isibuyile esigabeni somhlaba — kanti uBooth ufuna isahluko esilandelayo sihlanganise wonke amathalente aseNingizimu Afrika, asekhaya naphesheya.
